„ფენომენალური ცეკვა“ – მარია კაზაკოვასა და გიორგი რევიას ტრიუმფი ტალინში (ვიდეო)

ესტონეთის დედაქალაქ ტალინში დასრულდა მსოფლიო ჩემპიონატი იუნიორ მოციგურავეთა შორის. უდიდეს წარმატებას მიაღწია ქართულმა დუეტმა ყინულზე ცეკვაში – მარია კაზაკოვა და გიორგი რევია მსოფლიოს ვიცე-ჩემპიონები გახდნენ!

🤩 Captivating! This phenomenal Free Dance secured Maria Kazakova and Georgy Reviya 🇬🇪 the silver medal at the World Junior Championships!

Full Results: https://t.co/n7qP214HLl#WorldJFigure #FigureSkating pic.twitter.com/HMs2CDJ0Z5

— ISU Figure Skating (@ISU_Figure) March 7, 2020

18 წლის კაზაკოვასა და 20 წლის რევიას წყვილმა ჯამში 176.19 ქულა დააგროვა და მეორე ადგილი დაიკავა. წინ მხოლოდ ამერიკული დუეტი გავიდა (ვონლეი ნგუენისა და ვადიმ კოლესნიკის წყვილი), 117.18 ქულით. როგორც ხედავთ, ოქრომდე ქართულ დუეტს ქულაზე ნაკლები დააკლდა. მესამე ადგილი რუსებმა, ელიზავეტა შანაევამ და დევიდ ნარიჟნიმ დაიკავეს 175.17 ქულით.

რიტმული ცეკვების შემდეგ კაზაკოვა და რევია მხოლოდ რუსებს ჩამორჩებოდნენ, თანაც მხოლოდ 0.05 ქულით. თავისუფალ პროგრამაში მათ ეს ჩამორჩენა იოლად აღმოფხვრეს – 106.21 ქულა მიიღეს, შანაევა და ნარიჟნი მხოლოდ 105.14 ქულას დასჯერდნენ, მაგრამ აქამდე მესამე ადგილზე მყოფმა ამერიკელებმა თავისუფალ პროგრამაში 108.91 ქულა მიიღეს და ოქროს მედლებიც მათ მოიპოვეს.

„მიმზიდველი, ფენომენალური თავისუფალი ცეკვა მარია კაზაკოვასა და გიორგი რევიას შესრულებით, რომელმაც მათ მსოფლიოს ჩემპიონატზე ვერცხლის მედლები მოუტანა“, – წერს ISU ოფიციალურ ტვიტერის გვერდზე.

ეს კაზაკოვასა და რევიას პირველი მედლებია მსოფლიოს ჩემპიონატზე – 2018 წელს ისინი მე-9 ადგილზე გავიდნენ, 2019-ში კი – მე-6-ზე. ორი დისციპლინის ჯამში მათ თავიანთი კარიერის საუკეთესო ქულები მოიპოვეს.