ავსტრალიაში ტყის ხანძრების ლოკალიზებას ვერ ახერხებენ

ავსტრალიაში ტყეებში გაჩენილ ხანძრებს ვერ უმკლავდებიან. განსაკუთრებით რთული ვითარებაა ახალი სამხრეთ უელსის შტატში, სადაც ცეცხლი ქალაქ ედენს მიუახლოვდა. საშიშროების გამო მოქალაქეებს სახლების დატოვებისკენ მოუწოდეს.

შტატ ვიქტორიაში ათიათასობით აბონენტი ელექტროენერგიის გარეშეა დარჩენილი. მაშველები, სამხედროები და პოლიციელები იმ მოქალაქეების ევაკუაციას განაგრძობენ, რომლებმაც რამდენიმე დღე ოკეანის სანაპიროზე გაატარეს.

იმის მიუხედავად, რომ ავსტრალიის რამდენიმე რეგიონში დღეს გაწვიმდა და ჰაერის ტემპერატურამ დაიწია, საგანგებო სიტუაციების სამსახურში აცხადებენ, რომ ცეცხლის 200-ზე მეტი აქტიური კერის ჩასაქრობად ეს არ იქნება საკმარისი. მოქალაქეები ხელისუფლებას აკრიტიკებენ და აცხადებენ, რომ მთავრობას ხანძრების ლიკვიდაციის გეგმა არ აქვს.

ავსტრალიაში ხანძრები სექტემბრის შემდეგ მძვინვარებს. ამ დროის განმავლობაში დაიღუპა 24 ადამიანი. სამაშველო ოპერაციაში ათასობით მაშველი და სამხედროა ჩართული.

1tv.ge

P. S. INFO: ავსტრალიაში სექტემბის შემდეგ 4 იანვარს პირველად გაწვიმდა. წვიმამ მეხანძრე-მაშველები ძალიან გაახარა.

დაიწვა მილიონობით ჰექტარი ტყის ფართობი.

ტყის ხანძრებს დაახლოებით ნახევარი მილიარდი ცხოველი ემსხვერპლა.

კოალების პოპულაციის 30%-ზე მეტი განადგურებულია.