იანვარში საქართველოს ყველაზე მეტი მოქალაქე თურქეთიდან და ისრაელიდან გამოადეპორტეს, ათეულში იტალიაც მოხვდა

მიმდინარე წლის იანვარში საქართველოდან ჩვენი ქვეყნის 250 861 მოქალაქე გავიდა. ამის შესახებ ინფორმაციას შინაგან საქმეთა სამინისტრო ავრცელებს.

შსს-ს ცნობით, იანვარში საქართველოს მოქალაქეები შენგენის ზონის ქვეყნებიდან ყველაზე ხშირად გერმანიაში მიემგზავრებოდნენ. კერძოდ, იანვარში გერმანიაში საქართველოს მოქალაქეთა 7449 გასვლა დაფიქსირდა. მას მოსდევს იტალია 4172 გამგზავრებით, მე-3 ადგილზე კი პოლონეთია (3336 გასვლა).

აღნიშნულ სტატისტიკაში, აგრეთვე, მოცემულია ინფორმაცია საქართველოს მოქალაქეთა დეპორტაციის შესახებ. კერძოდ, მიმდინარე წლის იანვარში საქართველოს ყველაზე მეტი – 107 მოქალაქე თურქეთიდან გამოადეპორტეს; ამ მაჩვენებლით მეორე ადგილზეა ისრაელი, საიდნაც საქართველოს 82 მოქალაქე გამოაძევეს; მე-3 ადგილზე კი გერმანიაა (65 დეპორტი); გერმანიას მოსდევს საფრანგეთი, საიდანაც საქართველოს 26 მოქალაქის დეპორტაცია განხორციელდა.

საქართველოს მოქალაქეთა დეპორტაციის მიხედვით, ქვეყნების ათეულში არიან, ასევე: იტალია – 9; ბელგია, შვეიცარია და რუსეთი – თითოეული ამ ქვეყნიდან საქართველოს 7-7 მოქალაქის დეპორტი განხორციელდა; ათეულში ბოლო ადგილებს ავსტრია და საბერძნეთი იკავებენ (6-6 დეპორტი).