ყველაზე მარტივი კრემი ტორტისთვის – 3 ინგრედიენტი და იდეალური შედეგი 10 წუთში
ეს ნაზი კრემი სულ რაღაც 5-10 წუთში მზადდება. არაფრის ხარშვა არ დაგჭირდებათ, ხოლო გამოყენება შეგიძლიათ ტორტებისთვის, ნამცხვრებისა და დესერტებისთვის. სურვილის შემთხვევაში შეგიძლიათ საუზმეზეც მიირთვათ – უბრალოდ, წაუსვით პურის ნაჭერს.
თუ განსაკუთრებული დესერტის მომზადება გინდათ, მაგრამ დრო არ გაქვთ, ეს კრემი იდეალური გამოსავალია – მასთან ერთად ჩვეულებრივი ფუნთუშაც კი დახვეწილ ნამცხვრად გადაიქცევა. განსაკუთრებული კულინარიული უნარები არ არის საჭირო, ხოლო მიქსერის დახმარებით კრემი რამდენიმე წუთში მზად იქნება.
ინგრედიენტები
- კარაქი – 250 გ
- მოხარშული შესქელებული რძე – 1 ქილა
- ხაჭო – 300 გ
ვანილი (სურვილისამებრ) – 1 ჩაის კოვზი ექსტრაქტი, ან ერთი პაკეტი.
მომზადების წესი
- კარაქი წინასწარ გამოიღეთ მაცივრიდან – უნდა დარბილდეს, მაგრამ არ უნდა გადნეს (არ გამოიყენოთ მიკროტალღური ღუმელი დასარბილებლად).
- მოამზადეთ ხაჭო – სასურველია ძალიან წმინდა საცერში გაატაროთ. ეს კრემს უფრო ჰაეროვანსა და ერთგვაროვანს გახდის.
- მომზადებული ინგრედიენტები მოათავსეთ თასში და დაუმატეთ მოხარშული შესქელებული რძე, რომელიც კრემს სასიამოვნო კარამელის გემოს მისცემს.
- ჯერ ჩანგლით აურიეთ ერთგვაროვანი მასის მიღებამდე, შემდეგ კი მიქსერით კარგად ათქვიფეთ. სურვილისამებრ დაუმატეთ ვანილი.
როგორ გამოვიყენოთ
მზა კრემი ფორმას კარგად ინარჩუნებს. შეგიძლიათ გამოიყენოთ:
- ტორტის ფენებს შორის;
- ნამცხვრების (მაგ., შუს) შიგთავსად;
- ტორტის მოსართავად საკონდიტრო ტომრით;
- ფუნთუშებთან, ე. წ. „პეჩენიებთან“, ან ფენოვან ცომთან ერთად;
- უბრალოდ, პურზე ან ბაგეტზე წასასმელად.
თუ ცხობა გეზარებათ, კრემი იდეალურად ერწყმის მზა ნამცხვრებსაც (ე. წ. „პეჩენიებს“) ან თაფლაკვერებს – ძალიან გემრიელი დესერტი მყისვე მზად იქნება.
შენიშვნა: ხაჭოს ნაცვლად შეგიძლიათ კრემყველი გამოიყენოთ – მაგ. „ფილადელფია“, თუმცა ეს სიამოვნება უფრო ძვირი დაჯდება.
კირა კარიაული
