იტალიაში საპასპორტო პროცედურა იცვლება: PagoPA-ს ახალი სისტემა და EES-ის სტანდარტები დეკემბრიდან ამოქმედდება

იტალიაში 2025 წლის დეკემბრიდან ძალაში შედის მნიშვნელოვანი ცვლილებები პასპორტის მიღებისა და შენგენის ზონაში ევროკავშირის არაწევრი ქვეყნების მოქალაქეების საზღვრის გადაკვეთის წესებში. ეს რეფორმები მიზნად ისახავს პროცედურების მოდერნიზაციას, ციფრულ ადმინისტრირებაზე გადასვლას, უსაფრთხოების გაძლიერებასა და მიგრაციის მართვის ეფექტიანობის ამაღლებას.

ახალი სისტემა პასპორტის საფასურის გადახდაში – პლატფორმა PagoPA

ძირითადი ცვლილება არის პასპორტის საფასურის გადახდის ოქროს სტანდარტის გარდამავალი სისტემის შემოღება – ტრადიციული საფოსტო ბლანკი წარსულს ბარდება.

ძირითადი პირობები:

• პასპორტის საფასური ხდება 42,70 ევრო, რაც სულ ოდნავ მეტია, ვიდრე აქამდე იყო – 42,50 ევრო.
• გადახდა შესაძლებელია მხოლოდ პლატფორმა PagoPA-ს მეშვეობით – ეს არის საჯარო ადმინისტრაციის ოფიციალური ელექტრონული გადახდის სისტემა.
• აქამდე არსებული პრაქტიკისგან განსხვავებით, პასპორტის საფასურის გადახდა საფოსტო ბლანკით აღარ მოხდება.

გადახდის მთავარი გზებია:

• ფოსტის ფილიალები და თამბაქოს მაღაზიები (იტ. Tabacchi), რომლებიც PagoPA-ს ბლანკებს იღებენ;
• ბანკები და ონლაინ ბანკინგის პლატფორმები, რომლებიც სისტემაში მონაწილეობენ;
• აგრეთვე, შესაძლებელია საფასურის ონლაინ გადახდა ოფიციალური აპლიკაციების და ფოსტის და ბანკების გადახდის ვებგვერდების მეშვეობით, რაც მნიშვნელოვნად ამარტივებს პროცედურას.

გადახდისას აუცილებელია გადამხდელის (ან არასრულწლოვანი განმცხადებლის) პირადი მონაცემების მითითება, ფისკალური კოდის (codice fiscale) ჩათვლით.

გარდა ამისა, სახელმწიფო პოლიციის განმარტებით, პასპორტისთვის 1-ელ დეკემბრამდე გადახდილი საფასურის საფოსტო ქვითრები ძალაში რჩება და თავიდან გადახდა საჭირო არ არის.

ახალი რეალობა შენგენის ზონაში სამოგზაუროდ: ძალაში შედის სისტემა Entry-Exit System (EES)

საშინაო სიახლეების პარალელურად, ევროკავშირი ნერგავს მის ტერიტორიაზე შესვლა-გასვლის ახალ ტექნოლოგიას (EES), რომელიც ეხება მესამე (ევროკავშირის არაწევრი) ქვეყნების ყველა მოქალაქეს შენგენის ზონაში ჩასვლისას.

ოქტომბრიდან სისტემა ამოქმედდა შენგენის 25 ქვეყანაში, ისლანდიის, ნორვეგიის, ლიხტენშტაინისა და შვეიცარიის ჩათვლით. პასპორტებში შტამპის ჩარტყმა წარსულს ბარდება, ამის ნაცვლად ტარდება ბიომეტრიული რეგისტრაცია: თითების ანაბეჭდები, სახის ფოტო, თვალის ფერადი გარსის სკანირება და პასპორტის ნომრები.

ყველა ადამიანი, რომელიც ევროკავშირში ჩადის, ვალდებული იქნება პირველადი რეგისტრაცია მთავარ აეროპორტებსა და საზღვრებზე განთავსებული სპეციალური ტერმინალებიდან ერთ-ერთში გაიაროს. ანკეტა მოიცავს 4 სავალდებულო კითხვას, ხოლო რეგისტრაცია ძალაში იქნება მომდევნო 3 წლის განმავლობაში.

12 წლამდე ბავშვებს ბიომეტრიული რეგისტრაცია არ ეხებათ.

ახალი სისტემის მიზანი – უსაფრთხოება და კონტროლი გარე საზღვრებზე

EES-ის სისტემას Eu-Lisa მართავს, რომელიც 2011 წელს შეიქმნა. მისი სათავო ოფისი ტალინშია (ესტონეთი). ახალმა სისტემამ უნდა გაზარდოს პროცედურების გამჭვირვალობა ევროკავშირის გარე საზღვრებზე და პრაქტიკიდან ამოიღოს შტამპების ხელით ჩარტყმა, რითაც აქამდე შესვლის და გასვლის თარიღები აღინიშნებოდა.

დანიის მიგრაციის მინისტრმა რასმუს სტოკლუნდმა აღნიშნა, რომ ახალი სისტემა უზრუნველყოფს მესამე ქვეყნების მოქალაქეთა გადაადგილების ეფექტიან კონტროლს და მნიშვნელოვან როლს შეასრულებს ტერორიზმსა და არალეგალურ იმიგრაციასთან ბრძოლაში.

პრობლემა: რიგები და შეფერხებები საზღვარზე

მოსალოდნელ სიძნელეთა შორისაა სასაზღვრო კონტროლის გავლის დროის გახანგრძლივება, განსაკუთრებით დიდ აეროპორტებში. რომის აეროპორტ ფიუმიჩინოში უკვე დამონტაჟებულია თვითმომსახურების 200-ზე მეტი კიოსკი, ჩამპინოში – 20-ზე მეტი, მაგრამ რეალურმა დატვირთვამ და ტექნიკურმა ხარვეზებმა შესაძლოა პროცედურის გავლის სისწრაფეზე გავლენა მოახდინოს.

სიახლის მიმართ განსაკუთრებით უარყოფითად არიან განწყობილები ბრიტანელი მგზავრები, რომლებიც დიდი ბრიტანეთის ევროკავშირიდან გასვლის შემდეგ „მესამე ქვეყნის“ მოქალაქეებად ითვლებიან და ვალდებულნი არიან გაიარონ სრული ბიომეტრიული შემოწმება ევროკავშირის არაწევრი ყველა სხვა ქვეყნის მოქალაქეების მსგავსად.

რეკომენდაციები იტალიური პასპორტის ასაღებად და ევროკავშირში მოგზაურობის მსურველთათვის:

• პასპორტის აღებამდე გაეცანით PagoPA-ს გამოყენების წესებს და წინასწარ ჩარიცხეთ გადასახადი (42.70 ევრო);
• ინფორმაციისთვის მიმართეთ ოფიციალურ სახელმწიფო სამსახურს ან კონსულს;
• მგზავრობის დაგეგმვისას გაითვალისწინეთ EES-ის ახალი სისტემით გათვალისწინებული რეგისტრაციის პროცედურები.

ნინო ხოშტარია

ამავე თემაზე: მოგზაურობა ევროკავშირის ქვეყნებში – რა იცვლება შენგენის ზონაში შესვლის წესებში და რას უნდა ველოდოთ ETIAS-ის ამოქმედებამდე