იტალიაში ქართველი მამაკაცი მოკლეს, მკვლელობაში ეჭვმიტანილიც ქართველია

გარდაცვლილი მამაკაცი, 49 წლის პავლე შუბითიძე ცემის შემდეგ ტროტუარზე უგონოდ ეგდო და, როგორც გამოძიება ვარაუდობს, მისი გადარჩენა შესაძლებელი იქნებოდა, თუმცა ეჭვმიტანილმა მას კიდევ 2 სასიკვდილო დარტყმა მიაყენა.

მიუხედავად იმისა, რომ 118-ის ოპერატორები ადგილზე დროულად მივიდნენ და დაზარალებული მაშინვე სალერნოს „რუგის“ (Ruggi”) საავადმყოფოში გადაიყვანეს, ექიმების მცდელობა, გადაერჩინათ პავლე შუბითიძე, სამწუხაროდ, უშედეგოდ დასრულდა.

გამოძიების ვერსიით, დანაშაულის მოტივი პირადი ხასიათის უთანხმოება გახდა.

ინციდენტი შაბათს, 2 მარტს, საღამოხანს მოხდა სალერნოს ირნოს რაიონში, ვინჩიპროვას ქუჩაზე (via Vinciprova), ავტობუსის გაჩერებასთან, თვითმხილველთა თვალწინ, რომლებიც შემდგომ პოლიციამ დაკითხა. მათი თქმით, მამაკაცები ჯერ ერთმანეთს უყვიროდნენ, შემდეგ კი ჩხუბი ფიზიკურ დაპირისპირებაში გადაიზარდა და, სამწუხაროდ, ფატალური შედეგით დასრულდა. 

მიმდინარეობს გამოძიება ოლეგ ჭუჭულაშვილის წინააღმდეგ, რომელმაც დაკითხვისას ჩხუბში მონაწილეობა დაადასტურა. მას პოლიცია თანამემამულის მკვლელობას სდებს ბრალად.

ჯერჯერობით უცნობია, როდის გადმოასვენებენ გარდაცვლილს საქართველოში.

ნინო ხოშტარია