რატომ დაკარგეს ადამიანებმა კუდი?

ჟურნალ „ნატურეში“ გამოქვეყნებული ბოლო კვლევის მიხედვით, მეცნიერებმა დაადგინეს, რა არის, მათი აზრით, იმის მიზეზი, რის გამოც ადამიანებს კუდი არ აქვთ. „როდესაც პირველად დავიწყეთ ხალხთან ამ საკითხზე საუბარი, ძალიან გაგვაკვირვა იმ ადამიანების რიცხვმა, ვისაც თავისი კუდის დაბრუნება სურდა“.

ნიუ-იორკის უნივერსიტეტის ბიოქიმიისა და მოლეკულური ფარმაკოლოგიის მკვლევარი, პროფესორი იტაი იანაი საუბრობს იმ სასაცილო, მაგრამ ჩვეულებრივ რეაქციაზე, რომელიც მან და მისმა გუნდმა გამოხატა,
როდესაც მათი ახალი კვლევის გაცნობისას ბევრმა ადამიანმა თქვა, რომ კუდის ქონის სურვილი ჰქონდა.

„ორი ფეხი და ორი ხელი მაქვს, მაგრამ ძალიან მინდა, კუდიც მქონდეს“. კუდის დაკარგვის პრობლემისადმი ინტერესი მაშინ გაჩნდა, როდესაც გუნდის ერთ-ერთ მკვლევარს კუდუსუნის ძვლის მწვავე ტკივილი დაეწყო.

ტკივილი მას გამუდმებით აგონებდა კუდს და მასზე ფიქრისკენ უბიძგებდა. მან დაიწყო ძუძუმწოვრების გენების შესახებ არსებული მონაცემების შესწავლა და მალე აღმოაჩინა იმ გენის მუტაციაა, რომელიც ადამიანებსა და უკუდო მაიმუნებში ერთნაირია.

ამ გენს „თი ბი ექს თი“ ეწოდება და კუდის განვითარებისთვის მნიშვნელოვანია. „გადავწყვიტეთ, იგივე ცვლილებები თაგვის გენომში შეგვეტანა“.

კვლევითმა ჯგუფმა იგივე მუტაცია თაგვებშიც შეიტანა და გაირკვა, რომ მუტაციის მქონე თაგვები კუდის გარეშე დაიბადნენ.

შედეგები იძლევა საფუძველს ვივარაუდოთ, თუ რამ გვაქცია უკუდოდ, ანუ, რატომ განვიცადეთ ერთ-ერთი ყველაზე თვალშისაცემი ფიზიკური ცვლილება, რომლის მიზეზი გენეტიკურად არავის დაუსაბუთებია.

„დავკარგეთ კუდი, თავისი კუნთებით, ნერვებითა და ძვლებით, ანუ დავკარგეთ ერთიანი, მთლიანი, რთული სისტემა. მაგრამ როგორ დავკარგეთ? ეს კი თურმე საკმაოდ მარტივად და უბრალოდ მოხდა, რადგან ერთი პატარა ელემენტი დავკარგეთ“.

„ამ პატარა მუტაციამ არა მარტო კუდები დაგვაკარგვინა, არამედ ხეებიდანაც ჩამოგვიყვანა, რამაც ყველაფერი შეცვალა“, – ამბობს ნიუ-იორკის უნივერსიტეტის პროფესორი, იტაი იანაი.

„მოვლენის რამხელა ჯაჭვი მოჰყვა კუდის დაკარგვას, არა? გარკვეული გაგებით, ხეებიდან რომ ჩამოვედით, კუდი მაშინ დავკარგეთ“.

ბლენდა სეტერვალ კლინგერტი, „შვედეთის რადიოს“ მეცნიერების განყოფილება