საქართველოში დააკავეს ჩამოსული ქილერი, რომელიც ისრაელის მოქალაქე ბიზნესმენის ლიკვიდაციას ამზადებდა
სახელმწიფო უსაფრთხოების სამსახურმა ისრაელის მოქალაქის მკვლელობის მცდელობა აღკვეთა. დაკავებულები არიან პაკისტანისა და ირან-საქართველოს ორმაგი მოქალაქეობის მქონე პირები. იდენტიფიცირებულნი არიან უცხოეთში მყოფი ორგანიზატორები, მათ შორის დადგენილია მკვლელობის სავარაუდო შემკვეთი ირანის მოქალაქე და სხვა მონაწილე პირები, რომელთა მიმართ მიმდინარეობს კომპლექსური ოპერატიულ-სამძებრო ღონისძიებები.
„კურიერმა“ გაარკვია, რომ პირი, რომელიც თბილისში ებრაელი ბიზნესმენის ლიკვიდაციას ამზადებდა, 38 წლის ამირ ხანია. პაკისტანის მოქალაქე საქართველოში კონკრეტული მისიით ჩამოვიდა. მისი ერთადერთი სამიზნე თბილისში მცხოვრები ისრაელის მოქალაქე იყო, რომელსაც იგი 2 თვე უთვალთვალებდა.
გეგმის მიხედვით, დაქირავებული მკვლელი ბიზნესმენის ლიკვიდაციას უახლოეს პერიოდში აპირებდა, თუმცა დანაშაულის სქემა სახელმწიფო უსაფრთხოების სამსახურმა გაშიფრა. პაკისტანის მოქალაქე ამირ ხანი დიდი ოდენობით იარაღით და საბრძოლო მასალით, კონსპირაციულ ბინაში, სპეცოპერაციით აიყვანეს.
უსაფრთხოების სამსახურმა დაქირავებული ქილერის გარდა მისი მოკავშირეებიც დაადგინა. ამირ ხანს თბილისში მცხოვრები თანამზრახველები მკვლელობის დამკვეთმა უცხოეთიდან შეურჩია. ორივე მათგანი საქართველოსა და ირანის ორმაგი მოქალაქეა. გამოძიების ინფორმაციით, ეს პირები დაქირავებულ მკვლელს იარაღით ამარაგებდნენ. კონსპირაციული გეგმის მიხედვით, საბრძოლო მასალას სპეციალურად მოწყობილ სამალავებში ტოვებდნენ. კონსპირაციული ტელეფონები, იარაღი და საბრძოლო მასალა – ეს და სხვა მტკიცებულებები, გამოძიებამ დაკავებულების ჩხრეკის შედეგად მოიპოვა.
ებრაელი ბიზნესმენის ლიკვიდაციის დამკვეთს გამოძიება რამდენიმე ქვეყანაში ეძებს. სუს-მა მისი იდენტიფიცირება უკვე მოახდინა. „კურიერისთვის“ ცნობილია, რომ დაკავებული ქილერი დამკვეთზე ქართველი სამართალდამცველებისთვის მიცემულ ჩვენებაში საუბრობს. სუფიანი – ასე მოიხსენიებს ამირ ხანი პირს, რომელმაც ებრაელი ბიზნესმენის მკვლელობა შეუკვეთა.
მკვლელობის მისიით ჩამოსული ამირ ხანის ერთ-ერთი მოკავშირე რამდენიმე დღის წინ, გორის ქუჩაზე დაკავებული თარჯიმანი, მოჰსენ რაფი აღმოჩნდა. გამოძიების ინფორმაციით, საცხოვრებელი ბინიდან დიდი ოდენობით იარაღი და საბრძოლო მასალა ამოიღეს.
ბინაში, სადაც 4 საათიანი სპეცოპერაცია ტარდებოდა, „კურიერს“ არავინ დახვდა. მეზობლების ინფორმაციით, ბრალდებულის მეუღლემ საცხოვრებელი ადგილი შეიცვალა.
ასევე, „კურიერმა“ გაარკვია დაქირავებული მკვლელის კიდევ ერთი მოკავშირის ვინაობა. ფარჰაად ფაშაი სპეცოპერაციით გორგასლის ქუჩიდან აიყვანეს.
დაკავებულ სამივე პირს ამ დროისთვის ბრალი იარაღის და საბრძოლო მასალის უკანონო შენახვა ედებათ, თუმცა მათ ბრალს სავარაუდოდ უახლოეს დღეებში დაუმძიმებენ.
რა მოტივით შეუკვეთეს მკვლელობა და ვინ არის ქილერის სამიზნე ბიზნესმენი – გამოძიების ინტერესების გათვალისწინებით, დეტალები არ საჯაროვდება. საგამოძიებო მოქმედებები გრძელდება და არ არის გამორიცხული, ბრალდებულთა რიცხვი გაიზარდოს.
უკვე დაკავებული სამი პირის საქმის არსებითი განხილვა, თბილისის საქალაქო სასამართლოში, 26 დეკემბერს დაიწყება.
მოგვიანებით გაირკვა,რომ ისრაელელი, რომლის მოკვლასაც გეგმავდა საქართველო-ირანისა და პაკისტანის მოქალაქეების ჯგუფი, იციკ მოშეა – საქართველო-ისრაელის სავაჭრო პალატის პრეზიდენტი.ამ ფაქტზე ისრაელის მედიაც აქტიურად წერს.
საქართველოში ისრაელის ელჩი ჰადას მეიცადი ქართულ მხარეს მადლობას უხდის ისრაელის მოქალაქის მკვლელობის მომზადების დროული აღკვეთისთვის. ელჩმა, განცხადება ტვიტერის საკუთარ გვერდზე გაავრცელა.
1/5 ENG/GEO
Following the statement by the SSSG on the prevention of the assassination of an Israeli citizen: The Embassy of🇮🇱 would like to thank the state security services for their determined and professional efforts to ensure the safely and security of the Israeli citizen.— Hadas Meitzad 🇮🇱 (@HadasMeitzad) November 15, 2022
საქართველოს უსაფრთხოების სამსახურს ფეისბუქით მადლობას უხდის თავად ტერაქტის სამიზნე, ბიზნესმენი იციკ მოშე:
„გმადლობთ მხარდაჭერისთვის. მადლობა ისრაელის სახელმწიფოს პრეზიდენტს, იცხაკ ჰერცოგს გამამხნევებელი სიტყვებისთვის, მხარდაჭერისთვის და, რა თქმა უნდა, დიდი მადლობა საქართველოს უსაფრთხოების სამსახურს ტერაქტის გამოაშკარავებისა და ჩაშლისთვის. სამუშაო და საქმე ბევრია. ჩვენ ვაგრძელებთ და ვემზადებით ახალი სამუშაო დღისთვის – დილა მშვიდობის“, – წერს იციკ მოშე.
კომენტარები