ისრაელი ლავროვისგან ბოდიშის მოხდას ითხოვს – რა თქვა რუსეთის პირველმა დიპლომატმა ებრაელებზე?

ისრაელის საგარეო საქმეთა სამინისტრომ რუსეთის ელჩი გამოიძახა განმარტებისთვის რუსეთის საგარეო საქმეთა მინისტრის, სერგეი ლავროვის მიერ ებრაელებზე ნათქვამი სიტყვების გამო. ამის შესახებ, The Current Time-ის ინფორმაციით, ებრაული გამოცემა Kan 11 წერს. 

მანამდე ლავროვმა იტალიური სატელევიზიო არხის, Rete 4-ის გადაცემა Zona Bianca-ს ჟურნალისტს კითხვაზე: როგორ შეესაბამება უკრაინის „ნაციფიკაციის“ შესახებ ბრალდება იმას, რომ ქვეყნის პრეზიდენტი ვოლოდიმირ ზელენსკი ებრაელია? – ასე უპასუხა:

„შეიძლება ვცდებოდე, მაგრამ ადოლფ ჰიტლერს ებრაული სისხლი ჰქონდა. ეს აბსოლუტურად არაფერს ნიშნავს. ბრძენი ებრაელი ხალხი ამბობს, რომ ყველაზე თავგამოდებული ანტისემიტები, როგორც წესი, ებრაელები არიან. „ოჯახში ერთი მახინჯი მაინც არის“ – როგორც ჩვენში ამბობენ“.

ისრაელის საგარეო საქმეთა მინისტრმა იაირ ლაპიდმა განაცხადა, რომ ლავროვის სიტყვები „უპატიებელია, აღმაშფოთებელია და უხეში ისტორიული შეცდომაა“, – წერს Haaretz-ი.

„იმის თქმა, რომ ჰიტლერი ებრაელი იყო, იგივეა – თქვა, რომ ებრაელები თავად ხოცავდნენ თავიანთ თავს. ნაცისტები დევნიდნენ ებრაელებს, მხოლოდ ნაცისტები იყვნენ ნაცისტები, მხოლოდ ნაცისტები სისტემატურად ანადგურებდნენ ებრაელ ხალხს“, – ხაზგასმით აღნიშნა მან.

ლაპიდის თქმით, ისრაელი ლავროვისგან ბოდიშის მოხდას ელოდება და რუსეთის ელჩს საგარეო უწყებაში იბარებს.