საბერძნეთი წლის ბოლომდე „აქილევსის ფარის“ ამოქმედებას აპირებს
რა არის „აქილევსის ფარი“ და როგორ შეცვლის საბერძნეთის საჰაერო თავდაცვის სტრატეგიას
საბერძნეთში თავდაცვის სამინისტრო და შეიარაღებული ძალები აქტიურად მუშაობენ ახალი მრავალშრიანი საჰაერო თავდაცვის სისტემის – „Achilles Shield“-ის („აქილევსის ფარი“) შექმნაზე, რომელიც ქვეყანას დაიცავს დრონების (მათ შორის, „კამიკაძე დრონების“), სარაკეტო თავდასხმებისა და სხვა თანამედროვე საფრთხეებისგან. ეს პროგრამა წარმოადგენს საბერძნეთის მიერ განხორციელებული თავდაცვის მოდერნიზაციის ფართომასშტაბიანი პროგრამის მნიშვნელოვან ნაწილს, რომლისთვისაც 25-28 მილიარდ ევრომდე დაფინანსება უკვე დაგეგმილია მომდევნო რამდენიმე წელიწადში.
სისტემის მიზანია მოიცვას დრონების და სარაკეტო საფრთხეების მთელი სპექტრი და შექმნას ერთიანი ქსელი, რომელიც გააერთიანებს სხვადასხვა ტექნოლოგიურ კომპონენტს – რადარებს, მართვის ცენტრებსა და ანტისარაკეტო კომპლექსებს. ასეთი „ფარი“ გამოყენებული იქნება საბრძოლო მასალებისა და სტრატეგიულ ობიექტთა დაცვისთვის მთელი ქვეყნის მასშტაბით, განსაკუთრებით ქვეყნის აღმოსავლეთით, სადაც რეგიონული არასტაბილურობა და ტრანსნაციონალური საფრთხეების რისკი განსაკუთრებით მაღალია.
პროგრამის ერთ-ერთი მთავარი ფაზაა 36 PULS მრავალპუნქტიანი სარაკეტო სისტემის შეძენა ისრაელისგან, რისთვისაც საბერძნეთი უკვე აწარმოებს აქტიურ მოლაპარაკებებს თელ-ავივთან. ეს სისტემა მნიშვნელოვნად გააძლიერებს საბერძნეთის არმიის სარაკეტო შესაძლებლობებს – მისი დარტყმის რადიუსი 300 კილომეტრს აღემატება, ხოლო საბრძოლო მასალის სრული სპექტრი უფრო მოქნილ და თანამედროვე ოპერაციულ შესაძლებლობებს უზრუნველყოფს.
გარდა ამისა, წინასწარი შეთანხმებები ითვალისწინებს, რომ საბერძნეთის მიერ შეძენილი სისტემები მოიცავდეს სხვადასხვა კლასის კომპონენტებს, რაც გააძლიერებს ქვეყნის საჰაერო და ანტისარაკეტო თავდაცვის ერთობლივ სტრატეგიას. Achilles Shield-ის ძირითადი მიზანია შექმნას დეცენტრალიზებული, სწრაფად რეაგირებადი და მრავალშრიანი ფარი, რომელიც შეძლებს წინააღმდეგობა გაუწიოს თანამედროვე სამხედრო საფრთხეებს – არა მხოლოდ კლასიკურ თვითმფრინავებს, არამედ დაბალ სიმაღლეზე მფრინავ დრონებსა და მსუბუქ რაკეტებსაც.
ნიკო აბაშიშვილი
