მოუსმინეთ უსინათლო შაბან მამედოვს მარნეულიდან, რომლის ნამღერიც ლეგენდად ქცეულ ჰამლეტ გონაშვილს შეადარეს (ვიდეო)
24 წლის შაბან მამედოვი ეროვნებით აზერბაიჯანელია. იგი ქალაქ მარნეულის მკვიდრია. მისი მიზანია ქართული საგანძურის პოპულარიზაცია და მეგა-შოუ „ხალხურის“ პირველი სეზონის გამარჯვებულის ტიტულის მოპოვება.
შაბანმა ხალხური სიმღერა „დაიგვიანეს“ ანსამბლ „შავნაბადასთან ერთად შეასრულა. მისმა დახვეწილმა ნამღერმა და გამართულმა ქართულმა საზოგადოების დიდი აღფრთოვანება გამოიწვია – მართლაც საოცარი შესრულება იყო. სოციალური ქსელიც უამრავი თბილი და დადებითი კომენტარით აივსო.
შაბან მამედოვი 7 თვის იყო, როცა სეფსისი დაემართა და არასწორი მკურნალობის შედეგად მხედველობა დაკარგა. 9 თვის ასაკში თვალზე პირველი ოპერაცია გაუკეთეს, მერე კიდევ ორი ოპერაცია იყო, მაგრამ უშედეგოდ. მხედველობა საერთოდ დაკარგული აქვს და ჯერჯერობით საიმედო ამ კუთხით არაფერია. მიაჩნია, რომ თუკი პრობლემა არსებობს და არაფერი იცვლება, ეს მოცემულობად უნდა მიიღო.
შაბანმა მუსიკასთან ურთიერთობა ბავშვობაში დაიწყო. იგი მშრომელი და მიზანდასახული ადამიანია. როგორც ამბობს მისი მიზანია, მაქსიმალურად გააცოცხლოს ჰამლეტ გონაშვილი… „ეს კაცი ჩემთვის მართლა ღვთაებაა… ამ კონკურსის პერიოდშიც ვისზეც ვფიქრობდი, ჰამლეტი იყო, თითქოს მისი სახება სულ გვერდით მედგა და მკარნახობდა – აი, აქ ეს გავაკეთოთ, აქ ეს დავამუშაოთ… შეიძლება ვიღაცას ამაზე გაეცინოს, მაგრამ სულ მისი ინსპირაციით ვმოქმედებ… როცა ადამიანი ძალიან გიყვარს, ალბათ ასე ხდება…“ – ამბობს ინტერვიუში მუსიკოსი.
ეროვნებით აზერბაიჯანელს, „ხალხურში“ მონაწილეობის მიღებით სურს გამოხატოს პატივისცემა და სიყვარული ქართული ფოლკლორის მიმართ.
მანანა ბანძელაძე
კომენტარები