„მეგონა შემჭამა და გადამყლაპა“ – ვეშაპმა ახალგაზრდა კაცი „დააგემოვნა“ და უკან გადმოაფურთხა (ვიდეო)
ჩილეში, მაგელანის სრუტეში კუზიანმა ვეშაპმა ახალგაზრდა კაცი გადაყლაპა, თუმცა ამ უკანასკნელს იონა წინასწარმეტყველივით არ დაუყვია ვეშაპის მუცელში 3 დღე და ღამე. წყლის უზარმაზარმა ძუძუმწოვარმა მამაკაცი „დააგემოვნა“, მაგრამ მალევე უკან გადმოაფურთხა. ახალგაზრდა კაცმა წყლიდან უვნებლად ამოყვინთა. ინფორმაციას El Pais-ი ავრცელებს.
ინციდენტი 8 თებერვალს მოხდა. 24 წლის ადრიან სიმანკას ჯეიმსი, ვენესუელელი კომპიუტერების ტექნიკოსი პატაგონიის სანაპიროსთან მსუბუქი ნავით, კაიაკით მიცურავდა, როდესაც უზარმაზარმა ვეშაპმა წყლიდან ამოყვინთა და ახალგაზრდა კაცი გადაყლაპა. მომენტი შემთხვევით ადრიანის მამამ, დელმა გადაიღო, რომელიც შვილს უკან მიჰყვებოდა.
„ვიგრძენი ლორწოვანი ქსოვილი, რომელიც ჩემს სახეს ეხებოდა და უცნაური ხმები მესმოდა. მეგონა, რაღაცამ შემჭამა და გადამყლაპა. ვიფიქრე, რომ მკვლელი ვეშაპი იქნებოდა, რადგან ცოტა ხნით ადრე სწორედ ამ ვეშაპებზე ვსაუბრობდით, მაგრამ როცა უკან გამომიშვა, მივხვდი, რომ უბრალოდ ცნობისმოყვარე იყო და ჩემთან ურთიერთობას ცდილობდა“, – განაცხადა მან BBC-ს ესპანურენოვან გამოცემა BBC Mundo-სთან ინტერვიუში.
ფაქტის ამსახველი ვიდეო, რომელიც ახალგაზრდა კაცის მამამ, დელ სიმანკასმა გადაიღო, ინტერნეტში ვირუსულად გავრცელდა. ვიდეოში ისმის, როგორ მოუწოდებს იგი შვილს, სიმშვიდე შეინარჩუნოს.
კუზიანი ვეშაპი პლანეტის ერთ-ერთი ყველაზე გამძლე ზღვის სახეობაა. ის მსოფლიოს ყველა ოკეანეში ცხოვრობს და ათასობით კილომეტრზე მიცურავს მთელი წლის განმავლობაში. მამრი ვეშაპის სიგრძე საშუალოდ 15 მეტრს აღწევს, ხოლო მდედრები 19 მეტრამდე იზრდებიან. ორივე სქესის წონა 30-დან 40 ტონამდეა, ზოგჯერ კი მაქსიმუმ 48 ტონას აღწევს. ისინი, ძირითადად, პლანქტონებით, მცენარეებითა და თევზებით იკვებებიან. ამ სახეობის ვეშაპებს ვიწრო ყელი აქვთ, ამიტომ ადამიანის ზომის სხეული ძნელად თუ აღწევს კუჭს.
ინგლისელმა ოკეანოგრაფმა სუზანა ბუკენმა, რომელიც წლების განმავლობაში იკვლევს ვეშაპებს, ამ თავდასხმაზე ისაუბრა: „რა თქმა უნდა, ეს ვეშაპი მაგელანის სრუტეში საკვების მოპოვებაზე იყო კონცენტრირებული და შემთხვევით გადაყლაპა ეს ადამიანი, რომელიც კაიაკით მიცურავდა. შემდეგ კი უკან გადმოაფურთხა, რადგან, რა თქმა უნდა, ვეშაპები არ არიან ადამიანების მტაცებლები, ისინი აგრესიულები არ არიან. ფაქტობრივად, მათ არ აქვთ უნარი, გადაყლაპონ რაღაც ისეთი დიდი ზომისა, როგორიც ადამიანია. საბედნიეროდ, ამ კაცს არაფერი დაშავებია“, – განმარტა სპეციალისტმა ინსტაგრამზე გამოქვეყნებულ თავის კომენტარში.
ჩილეს სანაპიროზე ადამიანებზე ვეშაპების პირდაპირი თავდასხმა იშვიათია. პირიქით, ბოლო წლებში ვეშაპისებრთა სიკვდილიანობის ზრდა აღინიშნება. ეს დიდი ძუძუმწოვრები მუდმივად ხდებოდნენ სატვირთო გემებთან შეჯახების მსხვერპლი, ბოლო ათწლეულის განმავლობაში მათი ნაპირზე გამორიყვის არაერთი შემთხვევა დაფიქსირდა.
ნინო ხოშტარია
კომენტარები