ვადამდელი საპარლამენტო არჩევნების პირველი ტური კატასტროფად იქცა საფრანგეთის პრეზიდენტ ემანუელ მაკრონისთვის, რომელიც სრული პოლიტიკური იზოლაციის საფრთხის წინაშე აღმოჩნდა. ფრანგული მედია მკვეთრად რეაგირებს 30 ივნისს გამართულ არჩევნებში ულტრამემარჯვენეების უპრეცედენტო წარმატებაზე. ზოგიერთი გამოცემის თქმით, მაკრონის ეპოქა დასრულდა, მიუხედავად იმისა, რომ ის პრეზიდენტის თანამდებობაზე არჩევნების შემდეგაც დარჩება. არაერთი გაზეთი მოუწოდებს ამომრჩევლებს, არ დაუშვან არჩევნების მეორე ტურში რადიკალური პოლიტიკური ძალების გამარჯვება.
„როდესაც ისტორიკოსები პარლამენტის დათხოვნის გადაწყვეტილებას შეაფასებენ, ისინი გამოიყენებენ მხოლოდ ერთ სიტყვას: „კატასტროფა“. ამაზე დიდი კატასტროფის წარმოდგენა შეუძლებელია“, – წერს გაზეთი „ფიგარო“ თავის კომენტარში. ამ შემთხვევაში ფრანგულ გამოცემას მხედველობაში აქვს მაკრონის მიერ პარლამენტის დათხოვნა და ვადამდელი არჩევნების დანიშვნა, რაც პრეზიდენტმა სამი კვირის წინ გამართულ ევროპარლამენტის არჩევნებში თავისი პარტია „რენესანსის“ წარუმატებლობისა და ულტრამემარჯვენე „ეროვნული გაერთიანების“ (RN) ტრიუმფის გამო გააკეთა.
თუმცა ამ კვირას ჩატარებულ არჩევნებს მაკრონისთვის უკეთესი შედეგი არ მოუტანია. „ეროვნულმა გაერთიანებამ“ და მისმა მოკავშირეებმა ამომრჩეველთა ხმების 33 პროცენტი მიიღეს, მემარცხენე კოალიციამ – 28 პროცენტი, ხოლო მაკრონის ბანაკმა – მხოლოდ 20 პროცენტი, თუმცა მანდატების დიდი უმრავლესობის ბედი მეორე ტურში გაირკვევა.
გაზეთ „ლიბერასიონის“ ცნობით, მაკრონს სურდა, ევროპარლამენტის არჩევნების შემდეგ საკუთარი გუნდისთვის შექმნილი რთული მდგომარეობა გამოესწორებინა, მაგრამ პირიქით მოხდა და სიტუაცია მისთვის კიდევ უფრო გაართულა. „ის თავს ქაოსის წინააღმდეგ აღმართულ ბარიერად წარმოაჩენდა, ამომრჩევლებმა კი ქაოსისთვის პასუხისმგებლობა მას დააკისრეს. ის ამომრჩევლისგან პარლამენტში აბსოლუტურ უმრავლესობას ითხოვდა, რათა მშვიდად და ჰარმონიაში ემართა ქვეყანა, მაგრამ არჩევნების პირველმა ტურმა მაკრონისთვის მტკივნეული იზოლაცია კიდევ უფრო გააძლიერა“, – წერს „ლიბერასიონი“.
გაზეთები „Les Echos“ და „Dernières Nouvelles d’Alsace“ მაკრონის ეპოქის დასასრულის შესახებ წერენ. „მიუხედავად იმისა, რომ ქვეყნის საპრეზიდენტო არჩევნები 2027 წლამდე არ გაიმართება, მისი მმართველობისა და საპარლამენტო არჩევნების შედეგი იყო ის, რომ საფრანგეთმა უკიდურესი მემარჯვენეებისა და მემარცხენეების უპრეცედენტო წარმატების ფონზე გაიღვიძა“, – იუწყება Journal de la Haute-Marne.
„პოლიტიკომ“ კი დაწერა, რომ კვირას ჩატარებული არჩევნების შედეგები მაკრონისთვის „პირადი დამცირება“ იყო. გამოცემის აზრით, მაკრონს ახლა ორი ვარიანტი აქვს: მან ფოკუსირება ულტრამემარჯვენეების გაძლიერების შეჩერებაზე უნდა მოახდინოს, ან შეეცადოს, გადაარჩინოს თავისი ოდესღაც დომინანტური პოლიტიკური მოძრაობა, ვიდრე ის მთელ გავლენას დაკარგავს.
„არჩევანი ბოროტებასა და ნაკლებ ბოროტებას შორის“
რამდენიმე გაზეთი თავისი პირველი გვერდებიდან მოუწოდებს ამომრჩევლებს, ამ კვირის ბოლოს არჩევნების მეორე ტურზე გამოცხადდნენ, რათა რადიკალური პარტიების ხელისუფლებაში მოსვლა თავიდან აიცილონ. „ფიგარო“ მიიჩნევს, რომ ჯორდან ბარდელას „ეროვნული გაერთიანების“ გამარჯვებაზე კიდევ უფრო დიდი საფრთხე შესაძლოა იყოს უკიდურესი მემარცხენეების წარმატება ჟან-ლუკ მელანშონის მეთაურობით. Midi Libre-ის თანახმად, მეორე ტური იქნება „არჩევანი ბოროტებასა და ნაკლებ ბოროტებას შორის“.
„საფრანგეთი გარდამტეხ მომენტშია“, – წერს გაზეთი La Montagne და დასძენს, რომ ფრანგებმა არჩევანი ქვეყნის ისეთ მომავალზე უნდა გააკეთონ, რომელშიც რადიკალები დომინანტი ძალა არ იქნება.
კომენტარები