ესპანეთის სოციალისტურმა მუშათა პარტიამ (PSOE), რომლის ლიდერია მოქმედი პრემიერ-მინისტრი პედრო სანჩესი, პირველად მოიგო კატალონიაში (ესპანეთის ავტონომიური რეგიონი, დედაქალაქი – ბარსელონა) ადგილობრივი არჩევნები, ხოლო რეგიონის ესპანეთის შემადგენლობიდან გამოყოფის და დამოუკიდებლობის მომხრეები დამარცხდნენ. ამის შესახებ Bloomberg-ი იუწყება.
არჩევნების შედეგების მიხედვით გამოჩნდა, რომ შემცირებულია კატალონიის დამოუკიდებლობის მომხრე პარტიების რეიტინგი, რომლებმაც 2017 წელს კატალონიის ადგილობრივ არჩევნებში 49% მიიღეს, ხოლო წელს – 42%. სოციალისტების შემდეგ მეორე ადგილი დაიკავა პარტიამ „ერთად კატალონიისთვის“, რომელიც რეგიონის ესპანეთიდან გამოყოფის მომხრეა.
„ეს არის პირველი შემთხვევა, როდესაც სოციალისტურმა პარტიამ მოიგო არჩევნები როგორც ხმებით, ისე მანდატებით. ახალი ეტაპი, რომელსაც კატალონია დღეს იწყებს, არის ეტაპი ყველა კატალონიელისთვის“, – განაცხადა ავტონომიური რეგიონის სოციალისტური პარტიის ლიდერმა, ესპანეთის ყოფილმა ჯანდაცვის მინისტრმა სალვადორ ილამ. აღსანიშნავია, რომ კატალონიის რეგიონული არჩევნების კამპანიის პერიოდში კატალონიის ესპანეთთან ურთიერთობის საკითხმა უკანა რიგში გადაინაცვლა და წინასაარჩევნო პერიოდის მთავარი საკითხები იყო გვალვასთან გამკლავება და საბინაო პრობლემების გადაჭრა.
ამავე დროს, როგორც „ბლუმბერგი“ სტატიაში აღნიშნავს, საკუთარი პარტიის გამარჯვება პარლამენტში სანჩესის პოზიციას ართულებს, რადგან PSOE-ს პარლამენტში არ აქვს უმრავლესობა და იგი კატალონიის მცირე სეპარატისტული პარტიების მხარდაჭერას ეყრდნობა. აქედან გამომდინარე, „ბლუმბერგის“ სტატიის ავტორები ფიქრობენ, რომ პარტიის მიერ საკუთარ რეგიონზე კონტროლის დაკარგვამ შეიძლება სამთავრობო კრიზისი გამოიწვიოს.
მანამდე გავრცელდა კატალონიის ყოფილი ხელმძღვანელის კარლეს პუჩდემონის განცხადება, რომ ესპანეთის მომავალ საპარლამენტო არჩევნებზე თავის კანდიდატურას წარადგენს. როგორც ცნობილია, პუჩდემონმა ესპანეთი 2017 წელს დატოვა.
ნინო ხოშტარია
კომენტარები