ზედმეტად ჩაჭყლეტილი ცხვირი, ბრტყელი სახე, გადმოკარკლული თვალები – რატომ იკრძალება ჰიპერტიპული ძაღლები და კატები

ზედმეტად ჩაჭყლეტილი ცხვირი, გადმოკარკლული თვალები ან ძლიერ დანაოჭებული კანი… ასეთია უკიდურესობამდე მიყვანილი მახასიათებლები, რომლებიც ახლა მოდაშია, მაგრამ ჩვენი ძაღლებისა და კატების ჯანმრთელობისთვის ნამდვილი უბედურებაა.

ზოგიერთი სელექციონერი ჯიშების გადარჩევას წმინდა ესთეტიკური კრიტერიუმების საფუძველზე, თუმცა, ხშირად, ცხოველთა კეთილდღეობის საზიანოდ ახდენს. სიტუაციის გამოსასწორებლად, ვალონიის რეგიონი მალე დააწესებს მკაცრ კონტროლს გამრავლების ზოგიერთი მეთოდზე, რომლის გამოყენებითაც ჩნდებიან ისეთი ჰიპერტიპული ცხოველები, როგორიცაა, მაგალითად, არიელი, – მეტისმეტად ბრტყელსახიანი ბულდოგი, რომელსაც სწორად სუნთქვა უჭირს: „მისი სახე ძალიან დამოკლებულია, ნესტოები ნამცეცისოდენაა, ისინი თითქოს გამუდმებით ეკვრიან ცხვირს და სუნთქვას აფერხებენ“, – ამბობს ვეტერინარი, ფაბიენ ლებრუნი. პირველი მოსმენით უკვე მოწონებულია კანონპროექტი, რომელიც „ძაღლებისა და კატების გამრავლების უკეთესად გაკონტროლებას და ექსტრემალური გენეტიკური სელექციის თავიდან აცილებას“ ისახავს მიზნად.

მისი თქმით, მეპატრონეები, უპირველეს ყოვლისა, ესთეტიურად მიმზიდველ ცხოველს ეძებენ, ასეთი არჩევანის შედეგზე კი საერთოდ არ ფიქრობენ: „ეს ხდება სამომხმარებლო საზოგადოებაში, რომელშიც ძაღლს მხოლოდ მისი ფენოტიპის (რედაქტორის შენიშვნა: ცხოველის ფიზიკური თავისებურებები) მიხედვით ირჩევენ. მოსწონთ, რომ ის ლამაზია, მაგრამ ძაღლის კეთილდღეობაზე და მისთვის სიკეთის გაკეთებაზე აღარ ფიქრობენ. ამ ფენოტიპის გამო კი ძაღლი იტანჯება“, – გვაფრთხილებს ვეტერინარი.

მის ნათქვამს ვალონიის ცხოველთა კეთილდღეობის საბჭოც (CWBEA) ადასტურებს. ორგანიზაციაში მიაჩნიათ, რომ ზემოთ დასახელებულმა მახასიათებლებმა (ზედმეტად ჩაჭყლეტილი ცხვირი, ბრტყელი სახე, გადმოკარკლული თვალები…) შეიძლება გამოიწვიოს დისკომფორტი, ტკივილი, ტანჯვაც კი და, შესაბამისად, ცხოველების კეთილდღეობას ზიანი მიაყენოს. „ზოგიერთი ეს მახასიათებელი შესაძლოა გენეტიკურ დაავადებებს უკავშირდებოდეს, რომელთაგან ზოგიერთი ფატალური შედეგით მთავრდება“, – აღნიშნულია CWBEA-ს ვებ-გვერდზე.

ექსტრემალური მახასიათებლების მქონე ცხოველები საკმაოდ ძვირია, რადგან ისინი გულმოდგინე მოვლას (განსაკუთრებით, ქირურგიული კუთხით) საჭიროებენ. ეს დამატებითი სირთულეები პრობლემებს ცხოველთა თავშესაფრებსაც უქმნის, რომლებსაც, ასეთი ცხოველების მიღების შემთხვევაში, საკმაოდ მძიმე ფინანსური ტვირთი აწვებათ მხრებზე. აქამდე არ არსებობდა კანონი, რომელიც ჰიპერტიპული ცხოველების მოშენებას დაარეგულირებდა. დღემდე ეს საქმე მათი მფლობელების ცოდნასა და საღ აზროვნებაზე იყო მინდობილი.