Whatsapp-ის ახალი წესები ევროპელი მომხმარებლებისთვის: თქვენ ახლავე უნდა დაეთანხმოთ მას

2024 წლის 11 აპრილიდან ევროპელი მომხმარებლებისთვის „ვოტსაპის“ მოხმარების ახალი პირობები და კონფიდენციალურობის პოლიტიკა შევა ძალაში. კომპანიის ცნობით, ვინც ამ თარიღის შემდეგ მესენჯერის გამოყენებას გააგრძელებს, ჩაითვლება, რომ ამ ცვლილებებს ავტომატურად ეთანხმება.

ცვლილებები წარმოადგენს პასუხს ევროკავშირის ორ ახალ კანონზე – ესენია: კანონი სერვისების შესახებ (DSA) და კანონი ციფრული ბაზრის შესახებ (DMA).

დამატებითი ინფორმაცია იმის შესახებ, თუ რა არის დაშვებული „ვოტსაპში“

იქნება ახალი, უფრო ზუსტი განმარტებები იმის შესახებ, თუ რა კონტენტია დაშვებული მესენჯერსა და ახალ არხებზე და როგორ უნდა შეიტყოთ ამის შესახებ. ასევე განიმარტება დაბლოკვის ან არხის დიაპაზონის შეზღუდვის გასაჩივრების შესაძლებლობები.

ახალი გაიდლაინი ასევე შეიცავს ტექნიკურ დეტალებს და მონაცემთა დაცვის შესახებ ინფორმაციას იმის თაობაზე, თუ როგორ შეიძლება „ვოტსაპიდან“ შეტყობინებების გაგზავნა/მიღება „მესამე მხარის მიერ მოწონებულ აპლიკაციებზე“.

კოდირება უცვლელი რჩება

„ვოტსაპი“ ხაზს უსვამს, რომ ზარების და პირადი შეტყობინებების კოდირება უცვლელი რჩება: „ვერავინ, თავად „ვოდსაპიც“ კი, ვერ შეძლებს მათ წაკითხვას ან მოსმენას“, – ირწმუნება კომპანია.

მომხმარებლის მინიმალური ასაკი 16-დან 13 წლამდე მცირდება

„მეტა ჯგუფი“ ევროკავშირში შემავალ ქვეყნებში მცხოვრები „ვოტსაპის“ მომხმარებლისთვის იმავე მინიმალურ ასაკს აწესებს, როგორიც დანარჩენ მსოფლიოში არსებობს: ის 16-დან 13 წლამდე შემცირდება. ეს ნორმა უკვე დიდი ხანია მოქმედებს ფეისბუქისა და ინსტაგრამის აპლიკაციებისთვის, რომლებიც ასევე „მეტა ჯგუფს“ ეკუთვნის.

დათანხმება თუ წაშლა?

ვინც კატეგორიულად არ ეთანხმება ახალ წესებს, 11 აპრილიდან, სავარაუდოდ, იძულებული გახდება, თავის სმარტფონში „ვოტსაპის“ აპლიკაცია წაშალოს, ისევე როგორც ექაუნთი, რათა უსაფრთხოდ იყოს. თუ როგორ უნდა გაკეთდეს ეს, აღწერილია „ვოტსაპის“ განყოფილებაში – „დახმარება“.