„ჟერარ დეპარდიე საფრანგეთს არცხვენს“, – ამბობს კულტურის მინისტრი რიმა აბდულ-მალაკი

კულტურის მინისტრის, რიმა აბდულ-მალაკის თქმით, ჟერარ დეპარდიეს კომენტარები და 2018 წელს ჩრდილოეთ კორეაში მოგზაურობის დროს მისი ქცევა, რომელიც ახლახან გახდა ცნობილი France 2-ის სატელევიზიო შოუს მეშვეობით, არის „საფრანგეთის სირცხვილი“.

მთავრობის პრესმდივანთან, ოლივიე ვერანთან ერთად მუასაკში სტუმრობის დროს, რიმა აბდულ-მალაქმა დაგმო მსახიობის „აბსოლუტურად შოკისმომგვრელი კომენტარები და ის დამოკიდებულება, რომელიც თითქოს ხუმრობასა და პროვოცირებაზეა გათვლილი, მაგრამ სინამდვილეში უპატივისმცელობისა და უღირსობის გამომხატველია და არცხვენს საფრანგეთს“.

შეუსაბამო კომენტარები, რომლებმაც მინისტრში „ზიზღი გამოიწვია“

მსახიობის მოგზაურობის აქამდე უცნობი კადრებიდან, რომელიც France 2-მა გაავრცელა, კარგად ჩანს, რომ ჟერარ დეპარდიე აკეთებს შეუსაბამო კომენტარებს, იყენებს უხამს ჟესტიკულაციას და გამოსცემს ხმებს, რომლითაც ქალებთან სქესობრივი კავშირის იმიტირებას ახდენს. ის აცხადებს, რომ „ქალებს უყვართ ცხენზე ჯდომა, (რადგან) ამ დროს მათი კლიტორი უნაგირს ეხება (…) და ამით ისინი უზარმაზარ სიამოვნებას იღებენ“. ამის შემდეგ, დეპარდიე განაგრძობს: „ისინი დიდი მეძავები არიან“.

„ამან ზიზღი მომგვარა“, – აღნიშნა კულტურის მინისტრმა პარასკევს და დასძინა, რომ „ინსტრუქციების გაცემა კულტურის სამინისტროს საქმე არ არის, რადგან საფრანგეთში შემოქმედების სრული თავისუფლებაა“. „არსებობენ რეჟისორები, რომლებსაც შეუძლიათ გადაწყვიტონ, ჩართონ თუ არა ის თავის მომავალ ფილმებში. მე არ მრჩება შთაბეჭდილება, რომ ამ მომენტისთვის მის (დეპარდიეს) მაგიდაზე ბევრი შეთავაზება იდოს“, – განაცხადა რიმა აბდულ-მალაკმა.

ორი საჩივარი გაუპატიურების საქმეზე

მინიმუმ თექვსმეტმა ქალმა, რომელთაგან ცამეტს ჩვენება უკვე აქვს მიცემული, მსახიობი სექსიზმსა და სექსუალურ ძალადობაში დაადანაშაულა. 2020 წლიდან სამართალდამცავები გაუპატიურებისა და სექსუალური ძალადობის შესახებ ჟერარ დეპარდიეს მიმართ წაყენებულ ბრალდებებსაც იძიებენ. ერთ-ერთ საქმეში მსახიობი შარლოტა არნულდი ფიგურირებს, რომელმაც დეპარდიეს მხრიდან მასზე ძალადობის შესახებ გადაცემა Complément d’enquête-შიც ისაუბრა. პარიზის პროკურატურის ცნობით, სექტემბრის შუა რიცხვებში ჟერარ დეპარდიეს კიდევ ერთმა მსახიობმა ქალმა უჩივლა, რომელიც მას 2007 წელს ფილმის გადაღებისას სექსუალურ ძალადობაში ადანაშაულებს. დეპარდიე ამ ბრალდებებს უარყოფს.

ჟერარ დეპარდიე ალენ დელონისა და ბრიჯიტ ბარდოს ტოლ-სწორი ფრანგული კინოს ხატია, რომლის კარიერა ექსცესებითა და სკანდალებით გამოირჩეოდა. მას 200-ზე მეტი კინო და ტელეფილმში აქვს მონაწილეობა მიღებული.