საქართველოს ელჩი ისრაელის სახელმწიფოში ლაშა ჟვანია ისრაელში მყოფ საქართველოს მოქალაქეებს მოუწოდებს, დაიცვან უსაფრთხოების შესაბამისი ზომები. ელჩის ინფორმაციით, საელჩოში ცხელი ხაზი ამოქმედდა.
„ღაზის სექტორიდან სარაკეტო შეტევის გამო ისრაელის თავდაცვის სამინისტრომ საგანგებო მდგომარეობა გამოაცხადა ქვეყნის სამხრეთიდან ცენტრამდე (აშკელონიდან შდეროთი; ბეერ შევა; თელ ავივის ჩათვლით). ამავდროულად, გავრცელებული ინფორმაციით, რამდენიმე ტერორისტმა ისრაელის სამხრეთის ქალაქებში შეაღწია.
შეგახსენებთ განგაშის სიგნალის ჩართვის შემთხვევაში უსაფრთხოების წესებს:
- შენობაში ყოფნისას – უნდა შეხვიდეთ სპეციალურ დაცულ სივრცეში/თავშესაფარში, დაკეტეთ კარ-ფანჯრები;
- შენობის გარეთ ყოფნისას – იმ შემთხვევაში, თუ ახლოს არ მდებარეობს სპეციალური თავშესაფარი ან არ არის არცერთი შენობა, დაწექით და თავზე დაიფარეთ ხელები;
- ავტომობილში ყოფნისას – გააჩერეთ, გადმოდით ავტომობილიდან და შედით უახლოეს შენობაში ან თავშესაფარში. თუ თქვენს ახლოს შენობა ან თავშესაფარი არ მდებარეობს, გადმოდით მანქანიდან დაწექით და თავზე დაიფარეთ ხელები;
- დაუშვებელია შენობის შესასვლელში, სადარბაზოებში მოქალაქეების გაჩერება;
- სხვა ინსტრუქციის არარსებობის შემთხვევაში განგაშის სიგნალის დასრულებიდან 10 წუთის შემდეგ შეგიძლიათ დატოვოთ შენობა;
- დაუშვებელია ჩამოგდებულ რაკეტასთან ან სხვა ობიექტთან მიახლოება. ასეთ შემთხვევაში მოუწოდეთ მოქალაქეებს, არ მიუახლოვდნენ ობიექტს/ჩამოგდებულ რაკეტას და აცნობეთ პოლიციას;
- ტურისტული მიზნით ისრაელში მყოფმა პირებმა თავი უნდა შეიკავონ სასტუმროდან გამოსვლისგან და ტურისტული ტურებისგან.
თვალყური ადევნეთ მედიას შემდგომი ინსტრუქციების მისაღებად. საჭიროების შემთხვევაში გთხოვთ დაგვიკავშირდეთ ცხელ ხაზზე: +972526919092; +972 52-8888513; +972 54-7386813;
მშვიდობას ვუსურვებთ ისრაელს და ისრაელის მოსახლეობას“, – წერს ლაშა ჟვანია.
ღაზის სექტორიდან ისრაელის მიმართულებით რაკეტები დღეს, გამთენიისას გაუშვეს. თავდასხმაზე პასუხისმგებლობა მოძრაობა „ჰამასმა“ აიღო. ისრაელმა ქვეყანაში საომარი მდგომარეობა და რეზერვისტების მობილიზაცია გამოაცხადა.
ისრაელის ორგანიზაცია „დავითის წითელმა ფარმა“ („წითელი ჯვრის“ ანალოგი) განაცხადა, რომ ადგილობრივი დროით 17:35 სთ-ისთვის დაღუპულთა რიცხვმა ისრაელის მხარეს 70-ს მიაღწია, ღაზის სექტორში კი – 198-ს (ისრაელის საპასუხო დარტყმების შედეგად). სხვადასხვა სიმძიმის ჭრილობა და დაზიანება მიიღო ასობით ადამიანმა. ისრაელის N12 ტელეარხის ცნობით, ჰამასმა 50 კაცი მძევლად აიყვანა (ჰამასი 53 კაცს ასახელებს), ეს ინფორმაცია სხვა მედიასაშუალებებმაც გაავრცელეს. ისრაელის არმია ადასტურებს მძევლების არსებობას ჰამასის მხარეს, თუმცა მათ რაოდენობაზე კომენტარს არ აკეთებს.
კომენტარები