მარსელი სისხლიანმა ხოცვა-ჟლეტამ შეაზანზარა: „ნარკოომში“ ჩაბმულმა დაპირისპირებულმა ბანდებმა ერთმანეთს ცეცხლი გაუხსნეს

ხმელთაშუა ზღვის საფრანგეთის სანაპიროზე, მარსელში ორ ნარკობანდას შორის გაჩაღებულმა სისხლისმღვრელმა დაპირისპირებამ წელს უკვე ათობით ადამიანის სიცოცხლე შეიწირა.

პოლიციის თქმით, თავხედური თავდასხმების მსხვერპლნი ხშირად მოზარდები არიან. საფრანგეთის სიდიდით მეორე ქალაქის ცუდი რეპუტაციის მქონე ჩრდილოეთ კვარტლებში ნარკობაზრის კონტროლისთვის ერთმანეთს ებრძვის ორი ბანდა: „იოდა“ (Yoda) და „დიზეტ მაფია“ (DZ Mafia) . „ფრანს პრესის“ ცნობით, წლის დასაწყისიდან ამ ბანდებს შორის ომში 36 ადამიანი დაიღუპა, – ხუთით მეტი, ვიდრე 2022 წელს. „ეს არის სისხლიანი სასაკლაო“, – განაცხადა აპრილში ქალაქის პროკურორმა დომინიკ ლოურენსმა.

ამ განცხადებას მკვლელობების მორიგი სერია მოჰყვა, – მხოლოდ ბოლო თვეში კიდევ 12 ადამიანი დაიღუპა. ბოლო მსხვერპლი აღმოჩნდა 30 წლის მამაკაცი, რომელიც სამშაბათს, 15 აგვისტოს მარსელის ჩრდილოეთ ნაწილში კალაშნიკოვის ავტომატიდან გასროლით მოკლეს. „ეს არაფერია, თუ არა ახალი რაუნდი „იოდასა“ და „დიზეტ მაფიას შორის ბრძოლაში“, – განუცხადა 16 აგვისტოს ჟურნალისტებს პოლიციის პრეფექტმა, ფრედერიკ კამილერმა. მისივე თქმით, მიმდინარე წელს მარსელში ჩადენილი 68 მკვლელობის ან მკვლელობის მცდელობის 80 პროცენტის უკან სწორედ ეს ორი ბანდა დგას.

„მოკალი დასაშინებლად“

ზოგიერთი მსხვერპლიც და დანაშაულის ჩამდენიც მოზარდია, როგორც, მაგალითად, 17 წლის ახალგაზრდის შემთხვევაში, რომელიც ერთ-ერთ მრავალსართულიან შენობაში 30-მა თავდამსხმელმა სასიკვდილოდ სცემა. მკვლელობა პირდაპირ ეთერში Snapchat-ის აპლიკაციის საშუალებით გადაიცემოდა. კამილერის თქმით, თუ ადრე ნარკოტიკებთან დაკავშირებული მკვლელობები გავლენის ზონის გაფართოებას და ნარკოტიკების გავრცელების ახალი წერტილების დაკავებას უკავშირდებოდა, ახლა ეს, ძირითადად, კონკურენტების დაშინებაზეა გათვლილი. „ჩვენ ვხედავთ ახალ ლანდშაფტს, პარადიგმის ცვლილებას“, – ამბობს პოლიციის პრეფექტი და იქვე დასძენს, ნარკობანდის წევრები ახლა „დასაშინებლად კლავენ“ და ეს უფრო შურისძიებით მოტივირებულ სისხლიან შუღლს, „ვენდეტას“ ჰგავს.

გარდა ამისა, მკვლელობის ჩამდენები, ადრინდელთან შედარებით, უფრო ახალგაზრდები და ნაკლებად პროფესიონალები არიან. კამილერის თქმით, თუ ადრე ბანდები ამ საქმისთვის კვალიფიციურ სპეციალისტებს ქირაობდნენ, ახლა მკვლელობის შემსრულებლის მოძიება ჩვეულებრივი ამბავი გახდა და დარაჯის დაქირავებისგან არაფრით განსხვავდება. აპრილის დასაწყისში პოლიციამ დააკავა 18 წლის მატეო ფ., რომელიც 15 წლის ჯიბრილის და 16 წლის კაისის მკვლელობაშია ეჭვმიტანილი. მატეომ პოლიციას განუცხადა, რომ მკვლელობისთვის მას, საერთო ჯამში, 200 000 ევრო (218 000 აშშ დოლარი) გადაუხადეს.

როგორც ჩანს, ამ კუთხით, მსურველების დეფიციტი არ არსებობს, მიუხედავად იმისა, რომ გაზაფხულიდან მოყოლებული, პოლიციამ კილერთა ხუთი დაჯგუფების 17 სავარაუდო წევრი უკვე დააკავა. „მკვლელთა ასეთი მრავალრიცხოვანი ჯგუფის დაკავების შემდეგ პოლიცია ადრე ექვსთვიან სიმშვიდეს იღებდა, მაგრამ ეს დრო წარსულს ჩაბარდა“, – ამბობს კამილერი.

„დაარტყი მათ საფულეებს“

ბანდებთან დაკავშირებული მკვლელობების ზრდა, რაოდენ პარადოქსულიც არ უნდა იყოს, იმ დროს ხდება, როდესაც პოლიცია, ნარკოვაჭრების წინააღმდეგ ბრძოლაში, წარმატებებს აღწევს. წლის დასაწყისიდან ამოღებულია 740 ერთეული იარაღი, მათ შორის – 62 ავტომატი, რაც, 2022 წელთან შედარებით, 24 პროცენტით მეტია. გარდა ამისა, მარსელში დააკავეს 1144 ნარკორეალიზატორი, რაც 26 პროცენტით აღემატება 2021 წლის ანალოგიურ მაჩვენებელს. ამასთან, 70-ით შემცირდა იმ ადგილების რაოდენობა, სადაც კრიმინალური გარიგებები ხორციელდებოდა, თავად კრიმინალებს კი 12 მილიონი ევროს ოდენობის ქონება ჩამოართვეს. ივნისში, „მიმოს“ მეტსახელით ცნობილი მოჰამედ ჯეხის ალჟირში დაკავებით, სცენიდან გავიდა ნარკოტრეფიკინგში ჩართული ერთ-ერთი ყველაზე დიდი მოთამაშე.

კამილერის თქმით, ნარკოტიკებით ვაჭრობის ორგანიზატორებზე გასასვლელად, პოლიცია ფულის კვალს მიჰყვება. „ჩვენ ვცდილობთ, მათ საფულეებს დავარტყათ სადილერო წერტილების მოსპობის გზით, რომლებიც მათთვის ფულის მეწველ ძროხებს წარმოადგენენ. ასევე მიზანში გვყავს ფულის მომკრეფები და ქსელის კორდინატორები, რომლებიც ფულის გათეთრებაზე მუშაობენ“, – აცხადებს პოლიციის პრეფექტი.

„ჩვენ მძევლები ვართ“

როგორც საფრანგეთის შინაგან საქმეთა მინისტრი ჟერალდ დარმანინი ამბობს, პოლიციის განყოფილება CRS 8, რომელიც სპეციალიზირებულია ურბანული ძალადობის წინააღმდეგ ბრძოლაში, უახლოეს დღეებში მარსელში გაიგზავნება. ხუთშაბათს, 17 აგვისტოს, მან განაცხადა, რომ აღნიშნული ქვედანაყოფი მაქსიმალურ დარტყმას მიაყენებს ნარკოვაჭრების ლოკალურ ქსელებს, განსაკუთრებით – მათ სადილერო პუნქტებს. ივნისში, მარსელში ვიზიტის დროს, პრეზიდენტმა ემანუელ მაკრონმა ასევე დააანონსა ზომების მიღება მარსელის სკოლებში უთანასწორობის წინააღმდეგ საბრძოლველად, რაც, მისივე თქმით, ნარკობანდებს ქალაქში ახალგაზრდების რეკრუტირებას უადვილებს. პრეზიდენტმა პრობლემურ უბნებში არსებულ სიღარიბეზეც გაამახვილა ყურადღება. „ჩვენ აქ მძევლები ვართ“, – განუცხადა მაკრონს მარსელის ერთ-ერთმა მკვიდრმა. „ღამით გარეთ გასვლის გვეშინია, ყველას ქალაქიდან წასვლა უნდა“, – დასძინა მან.

მარსელს მსხვილმასშტაბიანი ნარკოტრაფიკის დიდი ხნის ისტორია აქვს. 1930-იანი წლებიდან მოყოლებული, ქალაქი „ფრანგული კავშირის“ (French Connection) ერთ-ერთი მთავარი ცენტრი იყო და ათწლეულების განმავლობაში, ჰეროინის წარმოებისა და კონტრაბანდის მსოფლიოში ყველაზე დიდი ქსელი გააჩნდა. კორსიკული წარმოშობის მაფიოზური ჯგუფების მიერ მართული French Connection მარსელს ამარაგებდა მორფინით, რომელიც ახლო აღმოსავლეთსა და აზიის სხვა რეგიონებში მოყვანილი ყაყაჩოსგან მზადდებოდა. მარსელის ლაბორატორიებში მას ჰეროინად გადაამუშავებდნენ და საექსპორტოდ შეერთებულ შტატებში გზავნიდნენ. ქსელი, რომლის არსებობაც უილიამ ფრიდკინის 1971 წლის ამავე სახელწოდების ფილმით (ჯინ ჰეკმენის მონაწილეობით) გახდა ცნობილი, მხოლოდ 1970-იანი წლების ბოლოს იქნა ლიკვიდირებული.