„თვითმფრინავის ბილეთების დაბეგვრა მატარებლების დასაფინანსებლად? 2024 წლის ბიუჯეტში ჩვენ გავზრდით გადასახადს ავიაბილეთებზე, რომელიც უკვე არსებობს“, – განაცხადა ტრანსპორტის მინისტრმა, კლემან ბონემ ორშაბათს, 7 აგვისტოს ფრანგულ რადიო RTL-ის ეთერში.
მისი განმარტებით, ეს ღონისძიება სამგზავრო მატარებლებში ინვესტიციების ჩადების საშუალებას იძლევა. „ბევრი გვეუბნება, რომ შოკირებულია იმით, რომ ხშირად ფრენა უფრო იაფი ჯდება, ვიდრე მატარებლით მგზავრობა. ჩვენ გვჭირდება მეტი ინვესტიცია რკინიგზაში“, – ასე ამართლებს დაგეგმილ ნაბიჯს კლემან ბონე.
მან ასევე პაუხი გასცა დასმულ შეკითხვას, არის თუ არა პროგრესი ნავთზე ევროპული გადასახადის შემოღების საკითხში და აღნიშნა, რომ მართალია, ამ მიმართულებით „საქმე წინ მიდის“, მაგრამ, ამავე დროს, საკითხის გადაჭრა მონაწილე ქვეყნების ერთსულოვნებას საჭიროებს. „აზრი არ აქვს საფრანგეთში ნავთზე გადასახადის დაწესებას, თუ გერმანიაში ან იტალიაში იგივე ნაბიჯს არ გადადგამენ“, – ამბობს მინისტრი. კლემან ბონე დარწმუნებულია, რომ ნავთზე გადასახადი, რომელიც, მისი მტკიცებით, რამდენიმე თვეში შევა ძალაში, „სამართლიანი და ეკოლოგიურად აუცილებელია“.
კომენტარები