25 წლის ქართველმა მეღვინემ ბორდოში ორი ღვინის ქარხნის ზედამხედველობა ჩაიბარა

25 წლის ქართველმა მეღვინე ანა ალასანიამ საფრანგეთში, კერძოდ, ბორდოს რეგიონში ორი ღვინის ქარხნის ზედამხედველობა ჩაიბარა. ქარხნები, რომელთაც კომპანია Vignoble K ფლობს, წელიწადში დაახლოებით 37 500 ბოთლ ღვინოს აწარმოებს.

„ვაწარმოებთ წითელ მშრალ ღვინოს მერლოსა და კაბერნე ფრანის „ასამბლაჟით“. ორი ქარხანა უშვებს ოთხი დასახელების ღვინოს, რომლიდანაც სამი ეკუთვნის პომეროლის რეგიონს, მეოთხე კი – სანტ-ემილიონის“, – ამბობს ანა ალასანია bm.ge-სთან ინტერვიუში.

მისივე თქმით, Vignoble K-ში მუშაობის დაწყებამდე ბორდოში მდებარე შატო Pichon Longueville Comtesse de Lalande-შიც მუშაობდა.

„დაახლოებით სამი წლის წინ მეღვინეობა-მევენახეობის განხრით ბორდოში მაგისტრატურაზე ჩაბარება გადავწყვიტე. სწავლის ბოლო წელს სამაგისტრო ნაშრომისთვის სტაჟირება შატო Pichon Longueville Comtesse de Lalande-ში (ბორდოს რეგიონში, კერძოდ, მედოკის ოლქში) გავიარე, სადაც სტაჟირების და დიპლომის აღების შემდეგ ერთწლიანი კონტრაქტი გამიფორმეს და დავრჩი სამუშაოდ. იქ, ძირითადად, ვენახში მიწევდა მუშაობა“, – ამბობს ანა ალასანია.

ორი თვის წინ კი მას ახალი სამსახური Vignoble K-ში გამოუჩნდა, სადაც უკვე უვადო კონტრაქტი გაუფორმეს ორ პატარა ღვინის ქარხანაში, რომელიც ოთხი დასახელების ღვინოს აწარმოებს.

ახალგაზრდა მეღვინე ბორდომდე საქართველოს აგრარულ უნივერსიტეტში მეღვინეობა-მევენახეობის ფაკულტეტზე სწავლობდა. როგორც ანა ამბობს, პირველი სამსახური ღვინის მაღაზია-ბარი „8000 მოსავალი“ იყო, სადაც  ღვინის კონსულტანტად და მიმტანად მუშაობდა. „იქ მუშაობამ დიდი გამოცდილება მომცა და გამაცნო ქართული ღვინის ბაზარი“, – ჰყვება ახალგაზრდა მეღვინე.

იგი ამბობს, რომ შორეულ მომავალს საქართველოს უკავშირებს, მანამდე კი სურს სამუშაო გამოცდილება საფრანგეთში დააგროვოს, რათა შემდეგ საინტერესო იდეით და გეგმით დაუბრუნდეს სამშობლოს.

bm.ge