fbpx
ჯანმრთელობა

სოკოს ყოველდღიურად მიღება სიმსივნით დაავადების რისკს 45%-ით ამცირებს

აშშ-ში მდებარე პენსილვანიის შტატის უნივერსიტეტის სამედიცინო კოლეჯში მომუშავე მეცნიერთა განცხადებით, კვების ყოველდღიურ რაციონში სოკოს შეტანის გზით სიმსივნით დაავადების რისკის 45 პროცენტით შემცირება შეგვიძლია. ამის შესახებ დეტალური ინფორმაცია გამოცემაში Advances in Nutrition ახლახან გამოქვეყნებულ ნაშრომშია წარმოდგენილი.

მეცნიერებმა ამ საკითხთან დაკავშირებით 1966-იდან 2020 წლამდე გამოქვეყნებული 17 კვლევა შეისწავლეს, რომელიც განუკურნებელი სენით დაავადებული 19500 პაციენტის მონაცემებს აერთიანებს. ჩატარებული ანალიზის შედეგად, მათ დაასკვნეს, რომ კიბოსგან თავის დასაცავად დღეში მხოლოდ 18 გრამი სოკოს მირთმევაც კი საკმარისია. სპეციალისტები აღნიშნავენ, რომ ულუფის გაზრდა მის ეფექტიანობაზე დადებითად აისახება, თუმცა ეს გარკვეულწილად სოკოს სახეობაზე და მომზადების წესზეც არის დამოკიდებული.

ცნობილია, რომ სოკო დიდი რაოდენობით ვიტამინებს, ცილებს, ბოჭკოებს, ანტიოქსიდანტებსა და მინერალებს შეიცავს. ამის მიუხედავად მედიკოსთა ყურადღების ცენტრში ამ ორგანიზმების სასარგებლო თვისებები საკმაოდ გვიან, ბოლო ათწლეულებში მოექცა. მრავალმა კვლევამ აჩვენა, რომ მათ ანთებისა და ჟანგვა-აღდგენითი რეაქციების საწინააღმდეგო ეფექტი აქვთ, რასაც ბუნებრივი ამინომჟავის, ერგოტიონეინის მეშვეობით ახერხებენ. ეს უკანასკნელი ადამიანის სხეულში არ გამომუშავდება, შესაბამისად, სოკოები ჩვენთვის ამ ნაერთის უნიკალურ წყაროს წარმოადგენენ.

მეცნიერთა განცხადებით, განსაკუთრებულად დიდი დოზით ერგოტიონეინს შიტაკი, ხეთამხალი, ფოთლოვანი აბედა და სხვა სოკოები შეიცავენ, თუმცა ჩვენი დაცვა საკვებად ვარგის ნებისმიერ სახეობას შეუძლია. ყველაზე კარგად ისინი ძუძუს , წინამდებარე ჯირკვლისა და საშვილოსნოს კიბოზე მოქმედებენ.

წყარო: popx.ge

კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close