„ფორბსმა“ ბათუმი 2020 წლისთვის საუკეთესო ევროპული საინვესტიციო ქალაქების სიაში შეიყვანა

„ფორბსმა“ ბათუმი 2020 წლისთვის საუკეთესო ევროპული საინვესტიციო ქალაქების სიაში შეიყვანა. როგორც გამოცემა წერს, ბათუმი სიდიდით მესამე ქალაქი და პოპულარული შავი ზღვის კურორტია საქართველოში.

„ამ დროისთვის ახალ შენობებზე სიმაღლის შეზღუდვები არ არის, ამიტომაც დეველოპერები და მყიდველები თავიანთ შესაძლებლობებს მაქსიმუმამდე ზრდიან“, – წერს გამოცემა ბათუმზე.

ამასთან, სტატიაში აღნიშნულია, რომ ქალაქში 2018-იდან 2019 წლამდე 22 752 ბინა აშენდა.

„ბათუმში იმის გამო, რომ მიწის დიდი ნაწილია ხელმისაწვდომი და მცირე შეზღუდვებია დაწესებული, ახალი პროექტები ჩნდება, რათა მოთხოვნის ზრდას უპასუხოს. ინვესტორები, მათ შორის, მეზობელი თურქეთიდან, 2000-წლიანი ისტორიითა და კულტურით, ასევე უფრო ცნობილ ევროპულ სანაპირო ჰაბებთან შედარებით მისაღები ფასებით არიან მოხიბლულები“, – წერს „ფორბსი“.

აღსანიშნავია, რომ გამოცემამ ინვესტიციების განხორციელებისთვის საუკეთესო ევროპულ ქალაქებს შორის, ბათუმის გარდა, კიდევ დაასახელა: ნიდერლანდების ქალაქი როტერდამი, იტალიის ქალაქი ნეაპოლი, საფრანგეთის ქალაქი მეჟევი, უნგრეთის ქალაქი სეკეშფეჰერვარი და პორტუგალიის ქალაქი პორტო.

1tv.ge