სულ ცოტა, 13 ადამიანი დაიღუპა იტალიის კუნძულ ლამპედუზასთან მიგრანტების ნავის გადაბრუნების შედეგად

კუნძულ ლამპედუზიდან რამდენიმე კილომეტრის დაშორებით მაშველებმა ზღვაში აღმოაჩინეს 13 ადამიანის ცხედარი, რომლებიც ნავის გადაბრუნების შედეგად დაიღუპნენ. ნავს ლიბიიდან იტალიის სანაპირომდე არალეგალური მიგრანტები გადაჰყავდა, – ამის თაობაზე 7 ოქტომბერს სააგენტო „ანსა“ იტყობინება. 

13-ვე გარდაცვლილი ქალია. მაშველებმა 22 ადამიანის გადარჩენა შეძლეს. უკვალოდ დაკარგული დანარჩენი მიგრანტების ძებნა გრძელდება.

გადარჩენილები ლამპედუზაზე გადაიყვანეს. მათი თქმით, სულ ნავზე 50 ადამიანი იმყოფებოდა, მათგან 8 ბავშვი დაკარგულია.

ოპოზიცია იტალიის ახალი მთავრობის ბრალეულობაზე საუბრობს, რადგან მთავრობამ ისევ გახსნა პორტები არალეგალური მიგრანტებისთვის, რომლებიც ზღვით ცდილობენ იტალიის სანაპირომდე მიღწევას.