ბარსელონაში საქართველოს 28 მოქალაქე დააპატიმრეს

ესპანური მედიის ცნობით, 29 მაისს ბარსელონის გარეუბანში მდებარე მენედეს პიდალის სახელობის მიტოვებული კოლეჯის შენობიდან ადამიანთა გამოსახლებაში, სასამართლოს დადგენილების საფუძველზე,  200-ზე მეტი პოლიციელი მონაწილეობდა. სულ გამოსახლებას დაექვემდებარა 119 ადამიანი.

იდენტიფიცირებულია საქართველოს 79 მოქალაქე, რომელთაგან 28 საიმიგრაციო კანონმდებლობის დარღვევის გამო დააპატიმრეს.

როგორც ესპანური მედიაგამოცემა Elperiodico წერს, კიდევ 40 ადამიანი იყო სხვა ეროვნების, მათ შორის, ესპანელებიც.

პოლიციაში აცხადებენ, რომ შენობაში მდებარეობდა ქართველი ე. წ. კანონიერი ქურდების თავშესაფარი. გამოძიების თანახმად, აღნიშნული პირები ეჭვმიტანილები არიან 70-ზე მეტი სახლის გაქურდვაში.

უკანასკნელი თვეების განმავლობაში ესპანეთში საქართველოს მოქალაქეთა ნაკადი მუდმივად ჩადის. Elperiodico აღნიშნავს, რომ თავშესაფრის მაძიებელთა შორის მამაკაცების გარდა არიან ქალები, ბავშვები, მოზარდები. ქალაქის სოციალური სამსახური ყველაზე დაუცველებს და გაჭირვებულებს თავშესაფრით უზრუნველყოფს.