კარგი ისტორიის მქონე ტურისტებისთვის შენგენის ვიზების გაცემა 2019 წელს გამარტივდება

ევროკავშირი 2019 წლის განმავლობაში სავიზო წესებს გაამკაცრებს უსაფრთხოების მიზნით, თუმცა იმ ტურისტებისთვის, რომელთაც კარგი ისტორია აქვთ, შენგენის ვიზების გაცემა გამარტივდება. ინფორმაცია ვებგვერდ EUROPA.EU-ზე ვრცელდება.

ევროკომისიის ინიციატივას ევროპარლამენტმა მხარი 19 აპრილს დაუჭირა. ეს საკანონმდებლო ცვლილება ძალაში რომ შევიდეს, ის ევროკავშირის 28-ვე ქვეყანამ უნდა დაამტკიცოს.

ახალი წესების თანახმად, ვინც შენგენის ზონის ქვეყნებში სამოგზაუროდ წასვლას გეგმავს, შეუძლია გამგზავრებამდე განაცხადი 6-თვიან ვიზაზე გააკეთოს (ახლა მხოლოდ 3 თვეა დაშვებული). ასევე იგეგმება მრავალჯერადი ვიზების გაცემა 5 წლით. ამის გარდა, სავიზო მოსაკრებელი იმ ქვეყნებიდან, რომლებთანაც ხელმოწერილია შეთანხმება სავიზო რეჟიმის გამარტივების შესახებ, 60 ევროდან 40 ევრომდე შემცირდება.

„ტურიზმი მნიშვნელოვან როლს ასრულებს ევროპის ეკონომიკისთვის და მშპ-ის შემოსავლების 10%-ს უზრუნველყოფს. მიუხედავად იმისა, რომ ევროკავშირის წევრი ქვეყნები წამყვან ტურისტულ მიმართულებებს შორისაა, დროში გაწელილი პროცედურები შეიძლება ევროპაში ტურისტების ნაკადის შემცირების მიზეზი გახდეს“, – ნათქვამია ევროკომისიის განცხადებაში.

წყარო: imedinews.ge

მსგავს თემაზე: აშშ-ის სავიზო განაცხადის შევსებისას სოციალური ქსელების მონაცემებს ითხოვენ

კომენტარები