საქართველოს მოქალაქეებს რუსეთში შესვლისთვის რეგისტრაცია დასჭირდებათ – 30 ივნისიდან ახალი წესები ამოქმედდება

დიპლომატიური უწყების ვებსაიტზე მითითებულია, რომ საუბარია „ექსპერიმენტის მეორე ეტაპზე“, რომელიც 2026 წლის 30 ივნისამდე გაგრძელდება. გამოქვეყნებული მონაცემების მიხედვით, იდენტიფიკაციისა და ავთენტიფიკაციის პროცედურა ნებაყოფლობითია.

„ექსპერიმენტის ფარგლებში, რუსეთში უვიზოდ შემოსული უცხო ქვეყნის მოქალაქეები ვალდებულნი იქნებიან, ჩასვლამდე, სულ მცირე, 72 საათით ადრე გაიარონ ციფრული რეგისტრაცია „Госуслуги RuID-ის“ აპლიკაციაში. გადაუდებელ შემთხვევებში (მაგალითად, ახლო ნათესავის ავადმყოფობის ან გარდაცვალების შემთხვევაში), განაცხადის წარდგენა დაშვებულია უფრო მოკლე ვადაში – ჩასვლამდე ოთხი საათით ადრე.

რუსეთის ფედერაციაში შესვლისთანავე, შესვლის განაცხადში მოცემული მონაცემების საფუძველზე, უცხო ქვეყნის მოქალაქეს ავტომატურად გადაეცემა СНИЛС (ინდივიდუალური პირადი ანგარიშის სადაზღვევო ნომერი), რომელიც აუცილებელია საკომუნიკაციო ხელშეკრულების დადებისა და SIM ბარათის შესაძენად”, – ნათქვამია განცხადებაში.

ექსპერიმენტი ვრცელდება უცხო ქვეყნის ყველა მოქალაქესა და მოქალაქეობის არმქონე პირზე, გამონაკლისს წარმოადგენენ: ბელარუსის მოქალაქეები; ექვს წლამდე ასაკის ბავშვები; დიპლომატიური მისიებისა და საკონსულო დაწესებულებების ხელმძღვანელები და თანამშრომლები, აგრეთვე, მათი ოჯახის წევრები; საერთაშორისო ორგანიზაციების თანამდებობის პირები (და მათი ოჯახის წევრები); დიპლომატიური და სამსახურებრივი პასპორტების მფლობელები და მათი ოჯახის წევრები.

მობილური აპლიკაციის მომხმარებლებს წინასწარ შეუძლიათ შეამოწმონ, აქვთ თუ არა რუსეთის ფედერაციაში შესვლის შეზღუდვები რუსეთის შინაგან საქმეთა სამინისტროსგან.

მანანა ბანძელაძე