საქართველოს ნაკრებმა ერთა ლიგის B დივიზიონის პლეი ოფის საპასუხო მატჩში ბორის პაიჭაძის სახელობის „დინამოს“ სტადიონზე სომხეთის ნაკრებს უმასპინძლა, 6:1 დაამარცხა და კვლავ B დივიზიონში ითამაშებს. შეგახსენებთ, რომ ერევანში 20 მარტს საქართველომ მშრალი ანგარიშით გაიმარჯვა 0:3. ორი შეხვედრის ჯამში კი ანგარიში 9:1 დაფიქსირდა. საქართველოს ნაკრების მთავარმა მწვრთნელმა ვილი სანიოლმა ჩვენი გუნდის შემადგენლობაში რამდენიმე ცვლილება განახორციელა – მოედანზე დაბრუნდნენ კაპიტანი გურამ კაშია და ლიდერი ხვიჩა კვარაცხელია, რომლებსაც პირველ შეხვედრაში არ უთამაშიათ დისკვალიფიკაციის გამო. ნიკა კვეკვესკირის ნაცვლად ძირითად შემადგენლობაში ანრი მექვაბიშვილი გამოჩნდა, ხოლო ირაკლი აზაროვის ნაცვლად - გიორგი წიტაიშვილი. შეხვედრა, როგორც მოსალოდნელი იყო, საქართველოს ნაკრების სრული უპირატესობით წარიმართა და ჩვენებმა პირველი გოლიც მალევე გაიტანეს - მე-4 წუთზე საქართველოს ნაკრებმა სწრაფი კონტრშეტევა განახორციელა, კიტეიშვილის დარტყმული ბურთი მცველს - ვარაზდატ აროიანს მოხვდა და კარში ჩაიჭრა. მე-14 წუთზე გიორგი ქოჩორაშვილის წამოწყებული კომბინაცია გიორგი მიქაუტაძემ დააგვირგვინა და ანგარიში 2:0 გახდა. მომდევნო 10 წუთში კიდევ ერთი გოლი გავიდა - 23-ე წუთზე შეტევა ხვიჩა კვარაცხელიამ წამოიწყო, საჯარიმოში სამ ფეხბურთელს გასცდა, ბურთი მიქაუტაძეს გადააწოდა, მან კი - ჩაკვეტაძეს, რომელმაც კარში შეუცდომლად დაარტყა და სხვაობა 3-მდე გაზარდა - 3:0. 27-ე წუთზე ანგარიში ისევ შეიცვალა ქართველების სასარგებლოდ - 4:0. ეს გოლიც კვარაცხელიას აქტიურობის შემდეგ ოთარ კიტეიშვილმა გაიტანა. 35-ე წუთზე მე-5 ბურთი გავიდა საქართველოს ნაკრების მეტოქის კარში - ამჯერადაც გიორგი მიქაუტაძემ იმარჯვა და დუბლი შეასრულა. ეს მიქაუტაძისთვის ნაკრების თამაშებში გატანილი მე-20 გოლი იყო, რითაც იგი შოთა არველაძის რეკორდს (26 გოლი) მიუახლოვდა. ხოლო საქართველოს ნაკრებისთვის პირველი ტაიმის ანგარიში - 5:0 სარეკორდო აღმოჩნდა ოფიციალურ შეხვედრებში. მეორე ტაიმში სტუმრები უფრო აქტიურად ათამაშდნენ და 48-ე წუთზე როგორც იქნა, მოახერხეს საქართველოს ნაკრების კარის აღება - ედგარ სევიკიანმა ბრწყინვალე გოლი გაიტანა და თავისი გუნდი მშრალი ანგარიშით წაგებას გადაარჩინა. ჩვენი გუნდის მე-6 გოლის ავტორი კი უკვე ხვიჩა კვარაცხელიაა: 62-ე წუთზე ხვიჩამ საჯარიმოში მიღებული ბურთი კარში ბრწყინვალედ დაარტყა და შეხვედრის საბოლოო ანგარიში დააფიქსირა - 6:1. ეს კი ხვიჩასთვის ნაკრების შემადგენლობაში გატანილი მე-18 გოლი იყო, რითაც იგი მესამე პოზიციას იკავებს ბომბარდირებში შოთა არველაძისა და გიორგი მიქაუტაძის შემდეგ. ტაბლოზე დაფიქსირებული ანგარიშის შემდეგ საქართველოს ნაკრების ფრანგმა თავკაცმა ახალბედების გამოცდის შესაძლებლობით ისარგებლა და მეორე ტაიმში მოედანზე გულიაშვილი (69-ე წუთზე წიტაიშვილი შეცვალა) და ზარია (77-ე წუთზე კიტეიშვილი შეცვალა) გამოიყვანა. შეხვედრის მთავარი არბიტრი იყო ინგლისელი მსაჯი ენტონი ტეილორი, რომელმაც 3-ჯერ გამოიყენა გაფრთხილების უფლება - 2-ჯერ სომეხ ფეხბურთელებს უჩვენა ყვითელი ბარათი უხეშობისთვის (ნარეკ გრიგორიანს და ედგარ სევიკიანს), ერთხელ კი - ქართველ ფეხბურთელს, გუნდის კაპიტან გურამ კაშიას. ნუცა ყაველაშვილი
კომენტარები