„ოსკარის“ 97-ე დაჯილდოების ნომინანტებს შორისაა ფილმი, რომელშიც მერაბ ნინიძე მონაწილეობს
ცერემონია ლოს-ანჯელესში 2 მარტს გაიმართება
ოთხშაბათს, 23 იანვარს ამერიკის კინოაკადემიამ „ოსკარის“ ნომინანტები დაასახელა. ლოს-ანჯელესის ხანძრის გამო 97-ე დაჯილდოების ცერემონია ორჯერ გადაიდო, თუმცა გუშინვე ცნობილი გახდა, რომ კინემატოგრაფიაში ყველაზე პრესტიჟული პრემიის გადაცემის ცერემონია 2 მარტს გაიმართება.
ლიდერობს ფრანგული კრიმინალური კომედია „ემილია პერესი“ (რეჟისორი – ჟაკ ოდიარი), რომელიც ყველაზე მეტ, 13 ნომინაციაზეა წარდგენილი. 10-10 ნომინაციაზეა წარდგენილი ორი ფილმი – ამერიკელი რეჟისორის, ბრედი კორბეტის „ბრუტალისტი“ და ამერიკელი რეჟისორის, პროდიუსერისა და სცენარისტის, ჯონ ჩუს „ალქაჯი“. აღსანიშნავია, რომ „ბრუტალისტში“ ქალის მთავარ როლს დემი მური ასრულებს, რომელიც ქალის როლის საუკეთესო შემსრულებლის ნომინაციაზეა წარდგენილი. ამ როლისთვის მსახიობმა „ოქროს გლობუსი“ უკვე მიიღო, რომელიც 62 წლის ვარსკვლავის 45-წლიან კინოკარიერაში (იგი 60-ზე მეტ ფილმსა და 9 სერიალშია გადაღებული) პირველი პრესტიჟული ჯილდოა. ამჯერად კინოკრიტიკოსები მას „ოსკარზე“ გამარჯვებას უწინასწარმეტყველებენ.
„ოსკარზე“ წარდგენილ ფილმში „კონკლავი“ (რეჟისორი – ედვარდ ბერგერი) ქართველი მსახიობი მერაბ ნინიძე მონაწილეობს. ფილმის მთავარი როლის შემსრულებელი რეიფ ფაინსი საუკეთესო მსახიობის ნომინაციაზეა წარდგენილი. მათ გარდა სურათში მონაწილეობენ ისეთი ვარსკვლავები, როგორებიც არიან: ჯონ ლიზგოუ, სტენლი ტუჩი და იზაბელა როსელინი.
სულ „კონკლავი“ „ოსკარის“ 8 ნომინაციაზეა წარდგენილი, მათ შორის, საუკეთესო ფილმის კატეგორიაშიც.
ფილმს საფუძვლად უდევს რობერტ ჰარისის ბესტსელერი „კონკლავი“. მასში სიუჟეტი ვატიკანში ვითარდება, სადაც პაპის გარდაცვალების შემდეგ კარდინალ ლოურენსს, რომლის როლსაც რეიფ ფაინსი ასრულენბს, ახალი პაპის პოვნას დაავალებენ. ამგვარად, ლოურენსი შეთქმულების მონაწილე ხდება, რადგანაც კარდინალები საკუთარი ინტერესების გატარებას ცდილობენ. პოლიტიკური მაქინაციების ფონზე მთავარი გმირი ხვდება, რომ გარდაცვლილ რომის პაპს ჰქონდა საიდუმლო, რომელიც უნდა ამოხსნას, სანამ ახალ პაპს აირჩევენ.
ქართველი მსახიობი მერაბ ნინიძე ფილმში ერთ-ერთი კარდინალის როლს ასრულებს ვატიკანის იმ კარდინალებიდან, რომლებიც „სიქსტის კაპელაში“ არიან იზოლირებულები ახალი პაპის ასარჩევად.
ნომინანტების სრული სია ნახეთ ამ ბმულზე: cnn.com/2025/01/23/entertainment/oscar-nominations-academy-awards
ნინო ხოშტარია
კომენტარები