თესალონიკში მეტრო იხსნება – როდიდან შეძლებენ მგზავრები სარგებლობას და რა ეღირება ბილეთი (ვიდეო)

თესალონიკში მეტროს გახსნამდე 65 დღე რჩება – პირველი მარშრუტი 30 ნოემბერს ამუშავდება. მეტრო ყოველდღიურად 254 ათას მგზავრს მოემსახურება.

Hellenic Metro SA-მ გამოაქვეყნა თესალონიკის 13 მეტროსადგურიდან 12-ის ინტერიერის ფოტოები, რომლებიც საათში 18 000 მგზავრს მოემსახურება. 12 სადგური მზადაა ექსპლუატაციისთვის, დარჩა მხოლოდ ვენიზელოსის სადგური, სადაც პრობლემები შეიქმნა ადგილზე აღმოჩენილი არქეოლოგიური ობიექტების გადატანასთან დაკავშირებით და გარკვეული ტექნიკური სამუშაოები ჯერ კიდევ მიმდინარეობს.

თესალონიკის მეტროს მთავარი ხაზის სიგრძე 9,6 კმ-ია, დაკავებული საერთო ფართობი – 22,5 ჰექტარი. მეტროს ხაზი იწყება ქალაქის ცენტრიდან და ახალი სარკინიგზო სადგურიდან, გაივლის მონასტირიუს, ეგნატიის და დელფის ქუჩებს და დამთავრდება ნეა-ელვეტიის რაიონში, სადაც პილაიის სადგურს დაუკავშირდება.

ყოველდღიურად 18 უპილოტო ავტომატური მატარებელი იმოძრავებს 30 კმ/სთ საშუალო სიჩქარით და მანძილს 17 წუთში დაფარავს. მეტრო საათში ყველა მიმართულებით 18 000 მგზავრს მოემსახურება, დღეში მთლიანობაში – 254 ათასს. მატარებლის მოცდის დრო თითოეულ სადგურზე თავდაპირველად 2,5 წუთი იქნება, დამატებით 15 მატარებლის მიღების შემდეგ კი 1,5 წუთამდე (90 წმ) შემცირდება.

პირველი რეგულარული მარშრუტი 30 ნოემბერს შესრულდება. ბილეთები უკვე გამოშვებულია. ბილეთის ფასი 0.90 ევრო იქნება (70 წუთზე), რაც 0.30 ევროთი იაფია ათენის მეტროს 90-წუთიან ბილეთზე, რომელიც 1,20 ევრო ღირს.