რუსეთის თავდასხმას უკრაინის სიდიდით მესამე ქალაქ დნიპროზე, ბოლო მონაცემებით, 45 ადამიანი შეეწირა, 20 დაკარგულად ითვლება, მათგან 11 ბავშვია. წინასწარი მონაცემებით, ოკუპანტების სტატეგიულმა ბომბდამშენმა TU-22m3-მა, Kh-22 ტიპის ფრთოსანი რაკეტით 9-სართულიან საცხოვრებელ კორპუსს დაარტყა.
14 იანვარს დაღუპულთა შორის არიან: 19 წლის სტუდენტი ლიანა ნონიაშვილი, მისი დედა ტატიანა ნონიაშვილი და ტატაიანას დედა. ლიანას მამა, უკრაინის მოქალაქე, 58 წლის ზაქარია ნონიაშვილი 2022 წლის მაისიდან რუსი ოკუპანტების ტყვეობაში იმყოფება. იგი საქართველოში, ახმეტის რაიონის სოფელ მატანში დაიბადა და გაიზარდა.
„დამუნჯებული ვარ, საუბარი მიჭირს. არ მჯერა, რომ ეს საშინელება ჩემი ძმის ოჯახში მოხდა. თვითონ 10 თვეა რუსების ტყვეობაშია, ლიანას და ტატიანას დაღუპვას ფსიქოლოგიურად როგორ გადაიტანს, ამის წარმოდგენაც კი მზარავს“, – უთხრა „ამერიკის ხმას“ პედაგოგმა ნონა ნონიაშვილმა, ზაქარია ნონიაშვილის დამ.
ზაქარია ნონიაშვილი სოფელ მატნიდან უკრაინაში საცხოვრებლად 40 წლის წინათ გადავიდა და ქართულ-უკრაინული ოჯახი შექმნა. ჰქონდა საკუთარი სადურგლო, იყო მარიუპოლში ქართული სათვისტომოს – „ჯორჯიას“ (Маріупольське грузинське товариство «Джорджія) ერთ-ერთი დამაარსებელი.
2022 წლის თებერვალში, უკრაინაში რუსეთის არმიის შეჭრის შემდეგ, მეუღლესთან ერთად, მეორე სამშობლოს დასაცავად, იარაღი აიღო ხელში და უკრაინის არმიის 109-ე ტერიტორიული თავდაცვის ბრიგადაში გაწევრიანდა.
ნონიაშვილებმა პირველად ომის საშინელება მარტის დასაწყისში განიცადეს, როცა ზაქარიას და ტატიანას ქალიშვილი, ხარკივის სახელმწიფო უნივერსიტეტის საერთაშორისო ურთიერთობების ფაკულტეტის პირველკურსელი, 18 წლის ლიანა ნონიაშვილი დაიკარგა ქალაქში, რომელსაც რუსები განუწყვეტლივ ბომბავდნენ.
გააგრძელე კითხვა აქ: amerikiskhma.com
კომენტარები