ქართველი მწერლის რომანის ბერძნული თარგმანის პრეზენტაცია ათენში, წიგნის საერთაშორისო ფესტივალის ფარგლებში (ვიდეო)
2 სექტემბერს საბერძნეთის დედაქალაქ ათენში, ზაპიოს პარკში ათენის 50-ე წიგნის საერთაშორისო ფესტივალი გაიხსნა, რომელიც 18 სექტემბრამდე გაგრძელდება. საქართველოს მწერალთა სახლის ინიციატივითა და საბერძნეთში საქართველოს საელჩოს მხარდაჭერით, საქართველო პირველად წარდგა ათენის წიგნის საერთაშორისო ბაზრობაზე ეროვნული სტენდით და ლიტერატურული პროგრამით.
ფესტივალის გახსნის ღონისძიებას ესწრებოდნენ საქართველოს მწერალთა სახლის დირექტორის მოადგილე მაია დანელია და საბერძნეთში საქართველოს საელჩოს პირველი მდივანი ანი უძილაური, აგრეთვე, თანამედროვე ქართველი მწერლები – ბექა ადამაშვილი და ივა ფეზუაშვილი, რომელთა ნაწარმოებები ბერძნულ ენაზე ითარგმნა და ფესტივალის ფარგლებში პრეზენტაციებიც დაიგეგმა.
შაბათს, 3 სექტემბერს, საღამოს 7 საათზე ადგილობრივი დროით ზაპიოს პარკში, ღია ცის ქვეშ მოეწყო ბექა ადამაშვილის რომანის – „ამ წიგნში ყველა კვდება“ ბერძნული თარგმანის პრეზენტაცია (თარგმნა ვერიკო მგელაძემ). პრეზენტაციას და ძალიან საინტერესო დისკუსიას უძღვებოდა ცნობილი ბერძენი რეჟისორი მიხეილ მარმარინოსი.
ვიდეოში სცენაზე მარცხნიდან – ივა ფეზუაშვილი, ბექა ადამაშვილი, მიხეილ მარმარინოსი, ვერიკო მგელაძე და ელინისტი, ფილოლოგი ანინა გოგოხია, რომელიც თარჯიმნობას უწევს მიხეილ მარმარინოსს.
დღეს, კვირას, 4 სექტემბერს, 19.00 საათზე ზაპიოს პარკში, ღია ცის ქვეშ ივა ფეზუაშვილის რომანის – „ბუნკერი“ ბერძნული თარგმანის პრეზენტაცია და დისკუსია გაიმართება.
ფესტივალის ფარგლებში ქართველ მწერალთა წიგნების პრეზენტაციების ორგანიზატორი გახლავთ საქართველოს საელჩოს პირველი მდივანი ანი უძილაური.
ნინო ბაჯელიძე
კომენტარები