ტელეწამყვანმა თამუნა მუსერიძემ 8-წლიანი ძებნის შემდეგ ბიოლოგიური მშობლები იპოვა, თუმცა მათ ჯერ არაფერი იციან (ვიდეო)
ტელეწამყვანმა და FB ჯგუფის „ვეძებ“დამფუძნებელმა, თამუნა მუსერიძემ სოციალურ ქსელში ვიდეო გაავრცელა, რომელშიც ამბობს, რომ მან 8-წლიანი ძებნის შემდეგ ბიოლოგიური მშობელი იპოვა.
ვიდეოში თამუნა მადლობას უხდის საზოგადოებას გულშემატკივრობისთვის და ბოდიშს იხდის, რომ დეტალებს ვერ ჰყვება. ირკვევა, რომ ჯერ მისმა ბიოლოგიურმა მშობლებმაც არ იციან, რომ თამუნას მშობლები არიან.
„მესმის და ვითვალისწინებ ყველა იმ ადამიანის მიმართ პასუხისმგებლობას, რომელიც მთელი ამ დროის განმავლობაში იყო ჩართული ჩემი მშობლების მოძიებაში და მეხმარებოდა ყველანაირად. მაგრამ, გამომდინარე იქიდან, რომ თავად ჩემმა მშობლებმაც არ იციან, რომ ჩემი მშობლები არიან, ყველა დეტალს ვერ დავწერ, სანამ მათ პირადად არ ვნახავ. რამდენიმე დღეში ვნახავ მათ პირადად და დეტალებს მოგაწვდით.
საიდან ვიცი, რომ ჩემი მშობლები – ჩემი მშობლები არიან, თუ მათ არ იციან? – საიდან და გენეტიკური ტესტის წყალობით დადასტურდა, რომ ისინი ნამდვილად ჩემი მშობლები არიან. ეს ტესტი გაიკეთა ჩემმა ნათესავმა და შემდგომ ყველაფერი გაირკვა. ასე რომ, ცოტაც დარჩა. ვნახავ და შემდეგ დანარჩენ ინფორმაციასაც მოგაწვდით“, – ამბობს ჟურნალისტი ახალ მიმართვაში.
თამარ მუსერიძე საქართველოს სხვადასხვა სატელევიზიო არხზე 18 წლის ასაკიდან მუშაობს. მისი ცხოვრება რადიკალურად შეიცვალა 31 წლის ასაკში, როცა აღმოაჩინა, რომ ნაშვილებია.
მან ყველაფერი გააკეთა ბიოლოგიური მშობლების მოსაძებნად, ძიების პროცესში კი აღმოაჩინა არაერთი მტკიცებულება, რომ საქართველოში 1950-იანი წლებიდან ბავშვების გაყიდვის „შავი ბაზარი“ არსებობდა.
თამუნა მუსერიძემ რამდენიმე წლის წინ შექმნა ფეისბუქჯგუფი „ვეძებ“, სადაც სისტემატურად ვრცელდება ინფორმაცია საქართველოში არსებული სხვადასხვა სამშობიაროდან წლების განმავლობაში ჩვილების სავარაუდო უკანონო გაშვილებისა და გაყიდვის შემთხვევების შესახებ.
2021 წლიდან, ანუ მას შემდეგ, რაც სოციალურ ქსელში ჯგუფი „ვეძებ“ შეიქმნა, თამუნა მუსერიძის თქმით, მოხერხდა 700-ზე მეტი ბიოლოგიური ოჯახის დაკავშირება, რომელთა შორისაც არიან უკანონოდ გაშვილებული/გაყიდული ბავშვებიც.
თამუნა მუსერიძე 2023 წელს ბრიტანული საზოგადოებრივი მაუწყებლის, „ბიბისის“ „100 ყველაზე გავლენიანი ქალის“ სიაში მოხვდა.
გადაცემა ჩაწერილია 2021 წელს.
ამავე თემაზე: ბრიტანული THE TELEGRAPH-ი საქართველოდან მოპარული ჩვილების შესახებ წერს
და-ძმამ ერთმანეთი იპოვა, კარგი ამბავი იტალიიდან მოვიდა – ნახეთ ემოციური ვიდეო
კომენტარები