„კვარაცხელია არ იყიდება… ამბის დასასრული!!!“ – „ნაპოლის“ განცხადება

ხვიჩა კვარაცხელიას აგენტმა მამუკა ჯუღელმა და მამამ ბადრი კვარაცხელიამ ტელეკომპანია „იმედის“ ეთერში განაცხადეს, რომ მათ ხვიჩას „ნაპოლიში“ დარჩენა არ სურთ და ჩემპიონთა ლიგაზე მონაწილე გუნდში მის გადაყვანას გეგმავენ.

კვარაცხელიას აგენტის ინტერვიუ იტალიური მედიის ყურადღების ცენტრში მოექცა, რასაც „ნაპოლის“ განცხადება მოჰყვა.

„ხვიჩა კვარაცხელიას აგენტის, მამუკა ჯუღელის და მისი მამის, ბადრი კვარაცხელიას განცხადებებთან დაკავშირებით „ნაპოლი“ იმეორებს, რომ ფეხბურთელს კლუბთან აქვს კონტრაქტი კიდევ 3 წლის ვადით. კვარაცხელია არ იყიდება. ფეხბურთელის ბედს, რომელსაც „ნაპოლისთან“ აქვს კონტრაქტი, არ წყვეტენ არც მამები და არც აგენტები, არამედ საფეხბურთო კლუბი „ნაპოლი“. ამბის დასასრული!!!“ – ნათქვამია განცხადებაში.

In riferimento alle dichiarazioni dell’agente di Kvaratskhelia, Mamuka Jugeli, e del padre Badri, il Calcio Napoli ribadisce che il giocatore ha un contratto di altri tre anni con la società. Kvaratskhelia non è sul mercato. Non sono gli agenti o i padri che decidono del futuro…

— Official SSC Napoli (@sscnapoli) June 16, 2024

ინფორმაციისთვის, იტალიური გამოცემები (და არა მარტო – ფრანგული „ლ’ეკიპიც“) წერდნენ, რომ ფეხბურთელის დამატება პარიზულ გრანდს – „პსჟ-ს“ სურდა, რომელსაც კილიან მბაპე მალე დატოვებდა (მბაპე, ფაქტობრივად, უკვე გადავიდა „რეალში“).

თუმცა ახლა ქართველ გულშემატკივრებს ტრანსფერებისთვის ნამდვილად არ გვცხელა – ხვიჩა კვარაცხელიას საქართველოს ეროვნულ ნაკრებთან ერთად სულ რამდენიმე წუთში დორტმუნდის „BVB არენაზე“ ვიხილავთ თურქეთის ნაკრების წინააღმდეგ.