ვიდეოკინო/ფილმებიჩვენი ფავორიტიიტალიასაქართველო

ნეაპოლში ლეგენდარული „ფეოლა“ იტალიურ ენაზე უჩვენეს – კვარას ფაქტორი (ვიდეო)

9 მაისს ნეაპოლში, კინოთეატრ Modernissimo-ში იტალიურ ენაზე დუბლირებული ლეგენდარული ქართული ფილმის – „ფეოლას“ ჩვენება გაიმართა.

ჟურნალისტი ნინა მამუკაძე-სორდინი, რომელიც 12 წელია იტალიაში ცხოვრობს, Corriere Dello Sport-თან საუბარში აღნიშნავს, რომ როდესაც იტალიელებმა მას კითხვები დაუსვეს კვარაცხელიასა და, ზოგადად, საქართველოს შესახებ, გადაწყვიტა, ქართული კინემატოგრაფია და ისტორია ფეხბურთის საშუალებით გაეცნო მათთვის. „ფეოლა“ უნივერსალური ფილმია, რომელიც ბევრ თემას მოიცავს. ქართველებს ეს ფილმი ძალიან უყვართ და მასში ნათქვამ ფრაზებს დღემდე იყენებენ. ყველა დაინახავს, როგორ შეიძლება გახდე ჩემპიონი არაფრიდან. ზუსტად ისე, როგორც კვარა, – ამბობს ნინა.

ნინა მამუკაძე-სორდინი „ფეოლას“ იტალიურ ჩვენებაზე

„ფეოლას“ იტალიური ვერსიის შექმნის იდეას მისმა ავტორმა პროექტის სახე მისცა, საქართველოს საგარეო საქმეთა სამინისტროს დიასპორის დეპარტამენტის მიერ გამოცხადებულ კონკურსში („დიასპორის ინიციატივების ხელშეწყობა“) წარადგინა და გაიმარჯვა, რის შედეგადაც შესაძლებელი გახდა იდეის ხორცშესხმა.

როგორ გახმოვანდა იტალიურ ენაზე ქართული კინოკომედიის კლასიკური ნიმუში – „ფეოლა“, ნახეთ სიუჟეტში. აქვე გეტყვით, რომ იპოლიტეს სპორტული ჟურნალისტი და ნეაპოლის მთავარი რადიოს დირექტორი ვალტერ დე მაჯო ახმოვანებს, ხოლო ხვედელიძეს – იტალიაში მოღვაწე ქართველი მსახიობი ლუკა ჩიქოვანი.

იტალიურად გახმოვანებული „ფეოლას“ ჩვენებამ ნეაპოლში წარმატებით ჩაიარა.

„ფილმის მსვლელობისას ვცდილობდი, დარბაზში მყოფი იტალიელი მაყურებლის რეაქცია დამეფიქსირებინა, იმიტომ რომ მუშაობის დროს ძალიან ვეცადეთ, გაგვეთვალისწინებინა ყველა ნიუანსი, რათა ფილმის ხასიათი არ დაკარგულიყო. საკმაოდ რთულია იმ რეალობის გადმოტანა, იტალიურ ენაზე მორგება, რაც ამ ფილმშია. არის ისეთი გამოთქმები, რომლებიც ზუსტად არ ითარგმნება იტალიურად, მაგრამ ძალიან ბევრი ვიმუშავეთ ამ ყველაფერზე და ვფიქრობ, შევძელით, რომ მუხტი არ დაგვეკარგა. ფილმმა ძალიან დიდი მოწონება დაიმსახურა. ჯერჯერობით მხოლოდ ერთი ჩვენება მოვაწყვეთ, რადგან ერთი ჩვენების უფლება გვქონდა. ამ პროექტში დიდი შრომაა ჩადებული, უდიდესი სამუშაო გავწიეთ და ძალიან გული დამწყდება, მხოლოდ ერთი ჩვენებით რომ შემოვიფარგლოთ. დიდი იმედი მაქვს, კიდევ მოგვცემს ეროვნული კინოცენტრი და, ასევე, „ ფეოლას“ სამართალმემკვიდრე ფილმის ჩვენების უფლებას. გვინდა, რომ იტალიის  ტური გავაკეთოთ და იტალიის ყველა ქალაქში ჩავიტანოთ იტალიურად გახმოვანებული ჩვენი „ფეოლა“, – უთხრა პროექტის ავტორმა და კოორდინატორმა ნინა მამუკაძე-სორდინიმ nostal.ge-ს.

ნინა მამუკაძე „ფეოლას“ ჩვენების შემდეგ ფილმის გახმოვანებაზე მომუშავე ჯგუფთან ერთად ( ფოტოზე მარჯვენა კიდეში – ლუკა ჩიქოვანი)
პატარა გოგონა ჩვენების შემდეგ გადაღებულ ამ ფოტოზე ერთ-ერთი გამხმოვანებლის შვილია – ალიჩე პერნა, რომელიც ნუნუს ახმოვანებს იტალიურად.
„ფეოლას“ ჩვენება ნეაპოლში
„ფეოლას“ ჩვენება ნეაპოლში

ცნობისთვის: „ფეოლა“ ეკრანზე 1970 წელს გამოვიდა. ფილმი მსახიობმა და რეჟისორმა ბაადურ წულაძემ გადაიღო, სცენარის ავტორები არიან რეზო გაბრიაძე და გიორგი ჩარკვიანი, ხოლო ფილმში გამოყენებული მუსიკალური კომპოზიციები ლეგენდარულ გია ყანჩელს ეკუთვნის.

ნახეთ ფრაგმენტი „იტალიური“ „ფეოლადან“.

ამავე თემაზე: ქართული ფილმი „ფეოლა“ – ბრაზილიელი მწვრთნელის იპოლიტე ხვიჩიასეული „გარდასახვა“

კომენტარები

Tags

Related Articles

Leave a Reply

Your email address will not be published. Required fields are marked *

Back to top button
Close