ჯორჯა მელონიმ სარდინიაში პირველი საარჩევნო მარცხი განიცადა

ჯორჯია მელონიმ სარდინიაში პირველი საარჩევნო მარცხი განიცადა.

პირველად ხელისუფლებაში მოსვლის შემდეგ, იტალიის პრემიერ-მინისტრის, ჯორჯია მელონის მემარჯვენე მთავრობამ არჩევნებში მარცხი განიცადა. სარდინიაში ჩატარებულ რეგიონულ არჩევნებში მცირე უპირატესობით მემარცხენე-ცენტრისტულმა ოპოზიციამ გაიმარჯვა. პარლამენტის წევრი, მოძრაობა „ხუთი ვარსკვლავის“ წარმომადგენელი ალესანდრა ტოდე, რომელიც მემარცხენე-ცენტრისტული „დემოკრატიული პარტიის“ მხარდაჭერითაც სარგებლობდა, კვირას, 25 თებერვალს გამართულ არჩევნებში გამარჯვების შემდეგ კუნძულის პირველი ქალი-პრეზიდენტი გახდა. მან მელონის ულტრამემარჯვენე პარტია „იტალიის ძმების“ წარმომადგენელი პაოლო ტრუცა დაამარცხა, რომლის კანდიდატურაც კოალიციურმა მთავრობამ წარადგინა. საბოლოო ოფიციალური შედეგების მიხედვით, ალესანდრა ტოდემ ხმების 45,4 პროცენტი მიიღო, რომელსაც ტრუცა მცირედით ჩამორჩა – მან ხმების 45 პროცენტი დააგროვა. ეს იყო მელონის პირველი მარცხი მას შემდეგ, რაც 2022 წლის ოქტომბერში იტალიის ხელისუფლების სათავეში მოვიდა.

არჩევნები იქცა ერთგვარ გარღვევად ორი მთავარი ოპოზიციური პარტიის ურთიერთობებში, რომლებმაც ერთმანეთს შორის უთანხმოება გვერდზე გადადეს და კენჭისყრაზე ერთიანი კანდიდატით წარდგენენ. „დღეს ჩვენ ვაჩვენეთ, რომ მემარჯვენეების დამარცხება შესაძლებელია“, – განაცხადა „დემოკრატიული პარტიის“ ლიდერმა ელი შლაინმა. ყოფილმა პრემიერ-მინისტრმა და მოძრაობა „ხუთი ვარსკვლავის“ ლიდერმა ჯუზეპე კონტემ, თავის მხრივ, დასძინა: „ჰაერი შეიცვალა – სარდინიის მოქალაქეებმა მელონის და კომპანიას კარი ჩაურაზეს და მის ალტერნატივას გაუღეს“. თუმცა ექსპერტები მიიჩნევენ, რომ რეგიონულ არჩევნებს გადაჭარბებული მნიშვნელობა არ უნდა მიენიჭოს, რადგან მასზე დიდ გავლენას ახდენს ადგილობრივი ფაქტორები, ჯანდაცვის საკითხებით დაწყებული და რეგიონის მოქმედი მემარჯვენე პრეზიდენტის კორუფციული საქმეების გამოძიებით დამთავრებული.

მელონის პარტია, ხელისუფლების სათავეში მისი მოსვლიდან მოყოლებული, მთელი ქვეყნის მასშტაბით გამართულ გამოკითხვებში დღემდე ლიდერობს. YouTrend-ის უახლესი კვლევის მიხედვით, „იტალიის ძმებს“ 28-პროცენტიანი მხარდაჭერა აქვთ, „დემოკრატიულ პარტიას“ რესპონდენტთა 19,6 პროცენტი ემხრობა, მოძრაობა „ხუთ ვარსკვლავს“ კი – 16,2 პროცენტი. „ყველა რეგიონული არჩევნები ბოლოს მაინც რეგიონულ ელექტორატზე დაიყვანება და ზედმეტი ექსტრაპოლაცია საჭირო არ არის, – განუცხადა „ფრანს პრესს“ ბრიტანეთის სურეის უნივერსიტეტის პოლიტიკის პროფესორმა და პოპულიზმის საკითხების ექსპერტმა, დანიელ ალბერტაციმ, – ამავე დროს, ამ არჩევნებმა აჩვენა, რომ „დემოკრატიული პარტია“ და „ხუთი ვარსკვლავი“ მხოლოდ ერთად თუ მოახერხებენ გამარჯვების გზაზე სიარულს, რადგან ძალიან ნაკლებად სავარაუდოა, რომ წარმატების მიღწევა რომელიმე მათგანმა მარტომ მოახერხოს“.

„სტრატეგიული შეცდომა“

მელონიმ არჩევნებში გამარჯვება მიულოცა ტოდეს, რომელიც კონტესა და ყოფილი პრემიერ-მინისტრის, მარიო დრაგის დროს უმცროსი მინისტრი (junior minister) იყო და ახლა სარდინიას ხუთი წლის განმავლობაში უხელმძღვანელებს. „დამარცხება ყოველთვის იმედგაცრუებაა, მაგრამ ამავე დროს დაფიქრებისა და მდგომარეობის გაუმჯობესების შესაძლებლობას იძლევა. ჩვენ ამ მარცხისგან სათანადო დასკვნებს გამოვიტანთ“, – წერს მელონი X ვებსაიტზე. სარდინიის დედაქალაქ კალიარის მერმა ტრუცამ დამარცხებაზე პასუხისმგებლობა თავის თავზე აიღო და ხაზი გაუსვა იმ ფაქტს, რომ მან გამარჯვება საკუთარ ქალაქშიც კი ვერ მოიპოვა. „სიმართლე ისაა, რომ ამაზე მელონი არ არის პასუხისმგებელი. ეს არ იყო ეროვნული არჩევნები~, – განუცხადა კალიარის 51 წლის მერმა ჟურნალისტებს.

თუმცა, ვინაიდან სარდინიის პრეზიდენტის პოსტზე ტრუცას დასახელებას მელონი დაჟინებით ითხოვდა, ამიტომ ბევრი ექსპერტი დამდგარ შედეგს იტალიის დღევანდელი პრემიერის პირად წარუმატებლობად აფასებს. მის მთავარ კოალიციურ მოკავშირეს, ულტრამემარჯვენე „ლიგას“ ლიდერს, მატეო სალვინის სურდა, რომ სარდინიის მოქმედ პრეზიდენტს კრისტიან სოლინასს, რომელიც ამ თანამდებობაზე 2019 წელს აირჩიეს, კიდევ ერთი ვადით ეყარა კენჭი, მაგრამ კენჭისყრამდე რამდენიმე კვირით ადრე სოლინასმა, კორუფციული ბრალდებების გამოძიების გამო, თავისი კანდიდატურა მოხსნა. „მელონიმ აქამდე, საერთო ჯამში, რამდენიმე შეცდომა დაუშვა… მაგრამ ამის გამოყენებას სალვინი უფრო შეეცდება, რათა თქვას, რომ ჯორჯა დაუმარცხებელი არ არის“, – მიიჩნევს ალბერტაცი.

მისი აზრით, ამ ეტაპზე მელონი ივნისში დაგეგმილ ევროპარლამენტის არჩევნებში კარგი შედეგების მიღწევას ისახავს მიზნად, მაგრამ სარდინიის არჩევნებში უკუსვლამ მის მოკავშირეებს საშუალება მისცეს, რომ საკუთარი ამბიციები წარმოაჩინონ, განსაკუთრებით – მომავალი რეგიონული არჩევნებისთვის კანდიდატების დასახელებისას. ამასთან, ალბერტაცი არ ფიქრობს, რომ მელონის „ლიგა“-სგან ან მისი მესამე კოალიციური პარტნიორის, მემარჯვენე ლიბერალური „ფორცა იტალიასგან“ დიდ გამოწვევები ელის, რომლებსაც ქვეყნის მასშტაბით, შესაბამისად, ხმების 8.3 და 7.6 პროცენტი აქვთ. „მაგრამ სარდინიაში ჯორჯას დამარცხების შემდეგ მისი კოალიციური მოკავშირეები მაინც შეეცდებიან, რომ საწოლს ცოტათი მაინც გადახადონ გადასაფარაბელი“, – დასძენს ალბერტაცი.

წყარო: Agence France-Presse