თურქეთში მიწისძვრები გრძელდება – დღეს მალათიაში მომხდარ მიწისძვრას მსხვერპლი მოჰყვა

თურქეთში დღეს 5.6 მაგნიტუდის სიმძლავრის მიწისძვრა მოხდა. ეპიცენტრი აღმოსავლეთით, მალათიის პროვინციაში დაფიქსირდა. მიწისძვრის კერის ფოკალური სიღრმე 7 კმ იყო. ინფორმაციას თურქული სააგენტო „ანადოლუ“ ავრცელებს.

მედიის ცნობით, სტიქიის შედეგად დაიღუპა ერთი ადამიანი, 69 დაშავებული საავადმყოფოში გადაიყვანეს; 29 შენობა დაინგრა.

ბიძგები მეზობელ პროვინციებშიც იგრძნობოდა, მათ შორის, გაზიანთეფშიც.

ბოლო 3 კვირის განმავლობაში ეს უკვე მეექვსე ძლიერი მიწისძვრაა თურქეთში.

6 თებერვალს ქაშრამანმარაშის პროვინციაში 9 საათის ინტერვალით მომხდარ 2 დამანგრეველ, 7,7 და 7,6 მაგნიტუდის მიწისძვრას კატასტროფული შედეგები მოჰყვა. დაღუპულთა რიცხვმა თურქეთსა და მეზობელ სირიაში 50 ათასს გადააჭრაბა. მარტო თურქეთში, ბოლო მონაცემებით, 44 374 ადამიანი დაიღუპა.

გასულ ორშაბათს, 20 თებერვალს ჰათაის პროვინციაში 2 ახალი მიწისძვრა მოხდა – 6,4 და 5,8 მაგნიტუდის. პირველს მსხვერპლი მოჰყვა.

საბედნიეროდ, უმსხვერპლოდ დასრულდა კიდევ ერთი, 5,3 მაგნიტუდის მიწისძვრა ნიღდეს პროვინციაში 25 თებერვალს.

ნინო ხოშტარია

მიწისძვრის თემაზე:

რომელ ქვეყნებში შეიძლება განმეორდეს მიწისქვეშა ბიძგები და როგორ მოვიქცეთ მიწისძვრის დროს (ვიდეო)

როგორ უნდა მოვიქცეთ მიწისძვრის დროს – საყურადღებო რჩევები