იტალიის პარლამენტის დეპუტატთა (ქვედა) პალატის თავმჯდომარემ რობერტო ფიკომ 24 იანვარს, 15:00 სთ-ზე პარლამენტის გაერთიანებული სხდომა მოიწვია რეგიონების დეპუტატების მონაწილეობით რესპუბლიკის პრეზიდენტის ასარჩევად.
როგორც დეპუტატთა პალატის პრესსამსახური იუწყება, სხდომის მოწვევის შესახებ ცნობა დღეს ოფიციალურ მაცნეში გამოქვეყნდება.
იტალიის პრეზიდენტს, კანონის თანახმად, გაერთიანებული კოლეგია ირჩევს – მთლიანობაში 1009 წევრი პარლამენტის ზედა (სენატი) და ქვედა (დეპუტატთა) პალატებიდან, 58 რეგიონული წარმომადგენლის ჩათვლით. ისინი ფარული კენჭისყრის რაუნდების სერიას გამართავენ.
ხმის მიცემის პირველ სამ რაუნდში პრეზიდენტის ასარჩევად საჭიროა ხმების მინიმუმ 2/3-ის მოგროვება, ხოლო მეოთხე რაუნდიდან უკვე აბსოლუტური უმრავლესობაც (50%-ს + 1) საკმარისია.
ექსპერტთა აზრით, ამ პოსტზე ფავორტად მიიჩნევა მოქმედი პრემიერ-მინისტრი მარიო დრაგი (დეკემბერში დრაგის მიერ გაკეთებული განცხადება, რომ მთავრობა დასახულ ამოცანებს მის გარეშეც გაართმევდა თავს, ბევრმა პრეზიდენტის პოსტზე მისი კანდიდატურის წამოყენების მინიშნებად მიიჩნია). სხვა პოტენციური პრეტენდენტები არიან: ყოფილი პრემიერ-მინისტრი სილვიო ბერლუსკონი (თუმცა სპეციალისტები მის შანსებს დაბალ შეფასებას აძლევენ), პარლამენტის ქვედა პალატის ყოფილი სპიკერი ფერდინანდო კაზინი, ყოფილი პრემიერ-მინისტრი ჯულიანო ამატო და ამჟამინდელი იუსტიციის მინისტრი მარტა კარტაბია.
ახალი პრეზიდენტი მოქმედ პრეზიდენტს – სერჯო მატარელას შეცვლის, რომლის უფლებამოსილების 7-წლიანი ვადა თებერვალში იწურება.
ნინო ხოშტარია
კომენტარები