ვინ აფინანსებს რიონის ხეობის დარაჯებს? – ემიგრანტებმა კამპანია „მეგადავრიცხე“ დაიწყეს

უკანასკნელ დღეებში გაჩნდა კითხვები რიონის ხეობის მოძრაობის ფინანსების შესახებ. საკითხი დაფინანსების წყაროების შესახებ განსაკუთრებით აქტუალური მას შემდეგ გახდა, რაც პროტესტმა გუმათიდან თბილისში გადმოინაცვლა, სადაც მათ ჰქონდათ ნაქირავები სცენა, გახმოვანების სისტემა, ეკრანები, დაბეჭდილი მაისურები და სხვა ატრიბუტიკა.

„რიონის ხეობის მცველები“ – მარიტა მუსელიანი და ვარლამ გოლეთიანი ამბობენ, რომ რამდენიმე დღეში გამოაქვეყნებენ ინფორმაციას იმის შესახებ, თუ რა რაოდენობის შემოწირულებას იღებენ, თუმცა შემომწირველების ვინაობას არ იტყვიან.

„რაც ვნახე, 21 ათასი დაჯდა სცენა, ამაზე დიდი ხარჯი არ გვქონია და, ამასთან ერთად, ორგანიზაციის სახელზე არის „მინივენი“, რომლითაც გადავაადგილდებით“, – უთხრა მარიტა მუსელიანმა რადიო თავისუფლებას და დაამატა: „5 დოლარით და 10 ლარით გროვდება თანხები, ისეთმა ხალხმა ჩარიცხა, რომლებიც შრომობენ უკანასკნელი ოფლის ფასად და ისე გზავნიან. ამიტომ ასეთ თანხას თუ მიზნობრივად არ გამოვიყენებთ, უბრალოდ, უნამუსობა იქნება“, – უთხრა მან 28 მაისს რადიო თავისუფლებას და განმარტა, რომ ეს იქნება მათი პასუხი „შავ პიარზე“, რომელიც „ნამახვანჰესის“ მშენებლობის მოწინააღმდეგეთა წინააღმდეგ წამოიწყო სხვადასხვა ჯგუფმა.

„ქართული ოცნების“ თავმჯდომარე ირაკლი კობახიძის განცხადებით, აქციას „დიდი ფულით“ აფინანსებენ და აქციის ორგანიზატორებს დაფინანსების წყაროების გასაჯაროებისკენ მოუწოდა.

სწორედ ამ განცხადების შემდეგ მოქალაქეებმა ფეისბუქში დაიწყეს კამპანია #მეგადავრიცხე იმის დასამტკიცებლად, რომ ნამახვანჰესის საწინააღმდეგო პროტესტი ნამდვილად სახალხო პროტესტია და მისი ერთადერთი დამფინანსებელი ხალხია.

ერთ-ერთი პირველი, ვინც კამპანია #მეგადავრიცხეს ფარგლებში, ფეისბუქზე ფოტოები გამოაქვეყნა და გაასაჯაროვა გადარიცხვები, იტალიაში მყოფი ემიგრანტი თეონა ბოტკოველია.

ჯგუფში „ქართველ ემიგრანტთა მსოფლიო გაერთიანება“ თეონა ბოტკოველმა პოსტი გაავრცელა, რომელსაც უცვლელად გთავაზობთ:

„მეგობრებო ❗❗❗
ჩვენ, როგორც რიონის ხეობის გადარჩენისთვის მოძრაობის მხარდამჭერი კოლექტივი, რომელსაც არაერთხელ შეგვიგროვებია ფინანსები ამ ბრძოლის სხვადასხვა საჭიროებებისათვის, ვიწყებთ კამპანიას ჰეშთეგით #მეგადავრიცხე რიონის ხეობის გადარჩენისთვის!

როგორც იცით, უკანასკნელ დღეებში გაჩნდა კითხვები რიონის ხეობის მოძრაობის ფინანსების შესახებ. მთავრობის მიერ დაფინანსებული ფეისბუქგვერდები და გარკვეული მედიები ამ მიმართულებით მოძრაობის დისკრედიტაციას ცდილობენ. როგორც იცით, რიონის ხეობის მოძრაობას დღიდან დასაწყისისა, ფინანსურად და არამხოლოდ ფინანსურად, სხვადასხვა რესურსებით მხარში უდგანან ამ ბრძოლის მხარდამჭერები, მათ შორის, განსაკუთრებით ქართველი ემიგრანტები მთელი მსოფლიოდან“, – წერს თეონა ბოტკოველი.

რიონის ხეობის მცველები წელგამართულები არიან, როდესაც  ფინანსებზე საუბრობენ, რადგან მათი დაფინანსების დიდ ნაწილს სწორედ ემიგრანტების მიერ გაღებული შემოწირულება შეადგენს.

კიდევ ერთი საყურადღებო პოსტი, რომელიც პასუხს სცემს კითხვას – ვინ აფინანსებს რიონის ხეობის დარაჯებს?

ვარლამ გოლეთიანის თქმით, სანამ ზუსტ ციფრებს გამოაქვეყნებენ, შეიძლება იმის თქმა, რომ ნახევარ წელიწადში, ძირითადად, ემიგრანტების დახმარებით რამდენიმე ათასი ლარი შეგროვდა.

მოამზადა მანანა ბანძელაძემ