„მეც მოვყოლოდი მაგ სახლის ქვეშ“ – მეწყერს გადარჩენილი გოგონა
ხელვაჩაურის სოფელ ჯოჭოში მეწყერმა ერთი სახლი წაიღო. თედორაძეების 4-სულიანი ოჯახიდან მხოლოდ მეექვსეკლასელი გოგონა, თიკა გადარჩა, რომელიც ტრაგიკული შემთხვევის დროს სახლში არ იყო – შუახევში ბებიასთან იმყოფებოდა.
სოციალურ ქსელში თიკა ემოციურ პოსტს აქვეყნებს:
„დეე, მაა, ძამიკოო, აი სიტყვებით ვერ აღვწერ, ისე მენატრებით. ბოლოჯერ მაინც ჩაგხუტებულიყავით და მეც მოვყოლოდი მაგ სახლის ქვეშ… დღეს ხომ მეც თქვენთან ერთად ვიქნებოდიი“, – წერს თიკა თედორაძე.
ტრაგედია პირველ ოქტომბერს, ღამით მოხდა. გოგონას მშობლები მაშველებმა მეწყრული მასიდან 2 ოქტომბერს ამოიყვანეს, გარდაცვლილები, მისი მეათეკლასელი ძმის ცხედარი კი ორი დღის ძებნის შემდეგ იპოვეს.
აჭარის მთავრობის თავმჯდომარის, თორნიკე რიჟვაძის განცხადებით, თიკა თედორაძეს სახელმწიფო მხარში დაუდგება და მეურვეობას გაუწევს.
კომენტარები