fbpx
მსოფლიორას არ გაიგებ/ფაქტები

+18! – ანტარქტიდაზე რეკორდულად მაღალი ტემპერატურა დაფიქსირდა

მყინვარების დნობის გამო ოკეანის დონემ შესაძლოა აიწიოს და სანაპირო რეგიონებს საფრთხე შეუქმნას

ანტარქტიდაზე დაკვირვებების წარმოების ისტორიაში ყველაზე მაღალი ტემპერატურა დაფიქსირდა – 6 თებერვალს ჰაერი +18 გრადუს ცელსიუსამდე გათბა და ეს მაჩვენებელი, სავარაუდოდ, რამდენიმე დღე შენარჩუნდება. ასეთი მონაცემები დაფიქსირდა ბაზა „ესპერანსაზე“, მატერიკის უკიდურეს ჩრდილოეთში. ამის შესახებ არგენტინის მეტეოროლოგიურმა სამსახურმა ტვიტერში დაწერა.

ამრიგად, მოიხსნა წინა, 2015 წლის 24 მარტის რეკორდი – +17,5 გრადუსი ცელსიუსი.

მსოფლიო მეტეოროლოგიურ ორგანიზაციაში (მმო) ვარაუდობენ, რომ რეკორდულად მაღალი ტემპერატურა დაკავშირებული უნდა იყოს რეგიონულ ფიონურ ქართან, რომელიც სიმაღლიდან დაშვებისას სწრაფად თბება.

მმო-ს მონაცემებით, ანტარქტიდის სანაპიროზე ტემპერატურა საშუალოდ +10-იდან -76 გრადუს ცელსიუსამდე მერყეობს.

ტემპერატურული დაკვირვება „ესპერანსას“ ბაზაზე 1961 წლიდან წარმოებს.

ანტარქტიდა სწრაფად თბება სათბური ეფექტის გამო, კვლევებმა აჩვენა, რომ ანტარქტიდის ბევრი მასიური მყინვარი დნება გლობალური დათბობის შედეგად და ეს საფრთხეს წარმოადგენს სანაპირო რაიონების მცხოვრებთათვის – ეს რაიონები შესაძლოა დაიტბოროს ოკეანის დონის მატების გამო.

ანტარქტიდის ყინულის საფარი, რომლის სისქეც ზოგიერთ ადგილას ხუთ კილომეტრს აღწევს, მსოფლიოს მტკნარი წყლის 90 პროცენტს შეიცავს, რაც საკმარისია იმისთვის, რომ ზღვის გლობალური დონე 60 მეტრამდე გაიზარდოს.

ანტარქტიდაზე +18 გრადუსია, თბილისში კი – ამწუთას (14:30) პლუს ერთი გრადუსი, ღამით – მინუს ექვსი იყო. ზოგადად, წლევანდელი ზამთარი თბილია და ჰაერის საშუალო ტემპერატურა საშუალო მრავალწლიურ ტემპერატურაზე დაახლოებით 1 გრადუსით მაღალია.

ნინო ხოშტარია

კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close