ჟურნალისტებმა შეადგინეს იმ ექიმების სია, რომლებიც პრეზიდენტ ვლადიმირ პუტინს მუდმივად თან დაჰყვებიან, მათ შორის ქირურგი-ონკოლოგიცაა, რომლის სპეციალიზაციაც ფარისებრი ჯირკვლის კიბოა – ამის შესახებ უცხოური საინფორმაციო გამოცემები მედიის გამოძიებაზე დაყრდნობით წერს.
„დაგპირდით, რომ გაგიმხელდით კრემლის მთავარ საიდუმლოს. რა თქმა უნდა, საუბარია ვლადიმირ პუტინის ჯანმრთელობაზე“, – აცხადებს საგამოძიებო მედიაჯგუფი Project-ი (იგივე Proekt), რომელიც რუსეთში დაბლოკილია და ახლა უცხოეთში მაუწყებლობს.
Project -ი ემხრობა დასავლეთში გავრცელებულ მოსაზრებას იმის შესახებ, რომ პუტინმა ომი გამოაცხადა მაშინ, როდესაც სერიოზული სამედიცინო პრობლემები აწუხებდა.
არსებული ინფორმაციით, პუტინის ჯანმრთელობა 2016-17 წლებში გაუარესდა.
ჟურნალისტური გამოძიების შედეგად Project-მა გამოავლინა მედიკოსები, რომლებიც რეგულარულად მოგზაურობენ პუტინთან ერთად. ჟურნალისტებმა შეისწავლეს მრავალრიცხოვანი ოფიციალური დოკუმენტაცია კრემლის მიერ ექიმებისთვის მივლინების გაფორმებასთან დაკავშირებით.
კონტრაქტების შესწავლისას ჟურნალისტები მივიდნენ დასკვნამდე, რომ 2016-2017 წლებში რუსეთის პრეზიდენტს თან საშუალოდ 5 ექიმი დაჰყვებოდა, თუმცა პერიოდულად მათი რიცხვი დრამატულად იზრდებოდა. მაგალითად, 2016 წლის ნოემბერში პუტინი ხალხის წინაშე 5 დღე არ გამოჩენილა. ამავე დროს, სოჭის სანატორიუმ „რუსში“ პუტინის სოჭში ყოფნისას ერთდროულად 12 ექიმი დააბინავეს.
2019 წელს პუტინს უკვე საშუალოდ 9 ექიმი დაჰყვებოდა თან.
მათ შორის ერთ-ერთია ქირურგი ევგენი სელივანოვი მოსკოვის ცენტრალური კლინიკური საავადმყოფოდან, რომელიც რუსეთის ლიდერთან არანაკლებ 35-ჯერ ჩაფრინდა შავი ზღვის კურორტ სოჭში.
კომენტარები