ზაფხულის სეზონზე, ძლიერი სიცხის დროს ბავშვებში სხვადასხვა დაავადების თავიდან ასაცილებლად ჯანდაცვის სამინისტრო რეკომენდაციებს ავრცელებს
![](https://nostal.ge/wp-content/uploads/2024/07/sicxe-da-bavSvebi.jpg)
საქართველოს ჯანდაცვის სამინისტრო ზაფხულის სეზონზე, ძლიერი სიცხის დროს ბავშვებში სხვადასხვა დაავადების თავიდან ასაცილებლად რეკომენდაციებს ავრცელებს.
„ზაფხულის სეზონზე ძლიერმა სიცხემ ბავშვებში, შესაძლოა, გამოიწვიოს სხვადასხვა დაავადება. მაქსიმალურად დაიცავით ბავშვი ძლიერი სიცხისგან, დააკვირდით მას და საეჭვო სიმპტომების გაჩენისთანავე დაუკავშირდით ექიმს.
ძლიერმა სიცხემ შესაძლოა, გამოიწვიოს დეჰიდრატაცია, ორგანიზმის გამოფიტვა, კრუნჩხვითი მოვლენები, სისხლის მიმოქცევის მოშლა.
დაუკავშირდით ექიმს, თუ ბავშვს აქვს: სისუსტე, ძლიერი დაღლილობა, თავის ტკივილი, ცხელება, გულისრევა, ღებინება, დაბუჟება, ქცევის ცვლილებები (ძილიანობა, ცუდ გუნებაზე ყოფნა), ჩვეულებრივზე სწრაფი და ღრმა სუნთქვა. თუ შეამჩნიეთ რომელიმე ეს სიმპტომი ძლიერი სიცხის დროს, გადაიყვანეთ ბავშვი გრილ ადგილას და მიეცით მას დიდი რაოდენობით სითხე.
ყველაზე მაღალი რისკის ქვეშ არიან ის ბავშვები, რომლებსაც აქვთ სუნთქვის გაძნელება (ასთმა), გულ-სისხლძარღვთა და თირკმელების დაავადებები, დიარეა, შეზღუდული გონებრივი და ფიზიკური შესაძლებლობები.
აბანავეთ ბავშვი გრილ წყალში იქამდე, ვიდრე არ იგრძნობს თავს ხალისიანად.
თუ იყენებთ ვენტილატორს, დადგით იგი ბავშვისგან უსაფრთხო მანძილზე და აკონტროლეთ ჰაერის ნაკადის მიმართულება.
გარეთ გასვლა დაგეგმეთ დღის უფრო გრილ პერიოდში.
თუ ხართ ისეთ ადგილზე, სადაც შეინიშნება კოღოების აქტიურობა, დაიცავით კანის თავისუფალი ზედაპირი მწერების საწინააღმდეგო საშუალებებით და მიჰყევით ამ საშუალების მწარმოებლის ინსტრუქციას.
არასდროს დატოვოთ ბავშვი გაჩერებულ (პარკირებულ) ტრანსპორტში ან მზის სხივების ქვეშ. გრილი ტემპერატურის დროსაც კი მანქანაში შეიძლება ტემპერატურამ სწრაფად მოიმატოს. ღია ფანჯრის შემთხვევაშიც კი 10 წუთში ტემპერატურამ, შეიძლება, მოიმატოს 6 გრადუსით.
თუ მზის სხივების არიდება შეუძლებელია, გამოიყენეთ მზისგან დამცავი კრემი, რომელიც შეიცავს ულტრაიისფერი სხივების ფილტრს და მიჰყევით კრემის მწარმოებლის ინსტრუქციებს“, – აღნიშნულია რეკომენდაციებში.
კომენტარები