იტალიის სახელმწიფო პოლიციის მიერ სამშაბათს, 12 მარტს გავრცელებული ინფორმაციის თანახმად, მას შემდეგ, რაც სამართალდამცავებმა მთელი ქვეყნის მასშტაბით მაფიის წინააღმდეგ მიმართული ოპერაცია დაიწყეს, უკვე 54 პირია დაკავებული, კიდევ ერთ ეჭვმიტანილზე კი დაკავების ორდერია გაცემული.
ოპერაციაში, რომელიც სიცილიაში ადგილობრივი სასამართლოს ინიციატივით და მაფიასთან ბრძოლის საოლქო დეპარტამენტის მოთხოვნით დაიწყო, პოლიციის სხვადასხვა განყოფილების 500-მდე თანამშრომელი მონაწილეობს.
დაკავებულებს ბრალად ედებათ „მაფიოზური ტიპის“ დანაშაულის ჩადენა, მათ შორის, ქონების ფიქტიური ფლობა, გამოძალვა და ნარკოტიკებით ვაჭრობა.
ამ ბრალდებებს ზოგიერთ შემთხვევაში ემატება იარაღისა და ასაფეთქებელი ნივთიერებების უკანონოდ ფლობა. ახალი ამბების ზოგიერთი სააგენტო ამ იარაღის გარკვეულ ნაწილს „საბრძოლო მასალად“ მოიხსენიებს.
მედიის ცნობით, ნარკოტიკების და იარაღის აღმოჩენის მიზნით, ეჭვმიტანილთა კუთვნილ შენობებსა და სხვა ადგილებში, სადაც ისინი საქმიანობდნენ, არაერთი ჩხრეკა ჩატარდა.
კომენტარები