ჩაძირული „ტიტანიკის“ სანახავად წასული ტურისტული წყალქვეშა ნავი „ტიტანი“ გაუჩინარდა (ვიდეო)
წყალქვეშა ნავი, რომელსაც ტურისტები „ტიტანიკის“ ნამსხვრევების სანახავად ოკეანის სიღრმეში ჩაჰყავდა, 18 ივნისს დაიკარგა. კავშირი ეკიპაჟთან ტურის დაწყებიდან საათისა და 45 წუთის შემდეგ გაწყდა.
წყალქვეშა ნავის, სახელად „ტიტანის“ ბორტზე ხუთი ადამიანი იმყოფებოდა – ეკიპაჟის წევრები და მგზავრები. დადასტურებულად ჯერჯერობით სამის ვინაობაა ცნობილი.ესენი არიან ბრიტანელი მილიარდერი, ბიზნესმენი და მკვლევარი, 59 წლის ჰამიშ ჰარდინგი, ასევე, პაკისტანელი ბიზნესმენი შაჰზადა დავუდი ვაჟთან, სულეიმან დავუდთან ერთად.
მათი ძებნა ამ დრომდე გრძელდება. წყალქვეშა ნავის სამძებრო სამუშაოებში ჩართულები არიან როგორც აშშ-ის სახელმწიფო სამსახურები, ისე წყალქვეშეთის მკვლევარი კომპანიები.
როგორც აშშ-ის სანაპირო დაცვის პოლიციამ Fox News-თან ინტერვიუში აღნიშნა, სამაშველო სამსახურს შემთხვევასთან დაკავშირებით 18 ივნისს აცნობეს. დაცვის პოლიციის წარმომადგენლის, ჯონ მოგერის თქმით, წყალქვეშა ნავი ისეა დაპროგრამებული, რომ დაბრკოლების შემთხვევაში ავტომატურად იწყებს ნაპირზე ამოსვლას. მსგავს სიტუაციაში მგზავრებს 70-დან 96 საათამდე ჟანგბადის მარაგი აქვთ. მოგერის თქმით, ნავის ძებნას ფართო სამძებრო არეალი და უამინდობა კიდევ უფრო ართულებს.
მსგავს ნავზე, როგორც წესი, პილოტი, ეკიპაჟის კიდევ ერთი წევრი და სამი ტურისტია ხოლმე. წყალქვეშა კაფსული გეზს „ტიტანიკის“ ჩაძირვის ადგილიდან 600 კილომეტრის დაშორებით იღებს, კუნძულ ნიუფაუნდლენდის მახლობლად.
„ნიუ-იორკ ტაიმსი“ წერს, რომ OceanGate Expeditions-ის ტურის ღირებულება $250 ათასს შეადგენს და მასში მონაწილეობისთვის სპეციალური მომზადება საჭირო არ არის, საკმარისია მხოლოდ, რომ მსურველს 18 წელი შესრულებული ჰქონდეს. გაუჩინარებული წყალქვეშა ნავი-კაფსული სატვირთო მანქანის ზომისაა. ის ბორტზე 5 ადამიანისთვის ოთხი დღის სამყოფ ჟანგბადს იტევს.
არსებობს ვერსია, რომ წყალქვეშა ნავი ოკეანის სიღრმეში არსებულ ნაგავში გაიჭედა.
გამოცდილმა მყვინთავმა მაიკლ ჰარისმა 20 ივნისს Fox News-ის გადაცემაში გამოთქვა შიში, რომ შესაძლოა „ტიტანი“ დაიშალა.
„ყველაზე ცუდია, თუ კორპუსს რამე მოუვიდა და ჩვენ ვშიშობთ, რომ დაახლოებით 3200 მეტრის სიღრმეზე ის გაიხლიჩა“, – თქვა ჰარისმა, რომელმიც შესაძლოა „ტიტანის“ 5 მგზავრიდან 3-ს იცნობდეს. ტელეარხის ცნობით, გამოცდილი მყვინთავი თვითონ ჩავიდა წყალქვეშ იმავე რაიონში და „ტიტანიკის“ ნამსხვრევები საკუთარი თვალით იხილა.
მაიკლ ჰარისმა Fox News-სთან საუბარში იმედი გამოთქვა, რომ „ტიტანის“ მგზავრებს გადაარჩენენ, თუმცა თუ ნავის ჰერმეტულობა 3200 მეტრის სიღრმეზე დაირღვა, მის მგზავრებს გადარჩენი შანსი, პრაქტიკულად, არ აქვთ.
„ტიტანიკი“ ატლანტის ოკეანის ფსკერზე, 3 800 მეტრის სიღრმეშია ჩაძირული. სამგზავრო ლაინერი, რომელიც თავისი დროის უდიდესი გემი იყო, 1912 წელს დიდი ბრიტანეთიდან აშშ-ში მიემგზავრებოდა. ხომალდმა კატასტროფა პირველივე ტრანსატლანტიკურ კრუიზზე განიცადა, როცა აისბერგს შეეჯახა. ბორტზე მყოფი 2200 მგზავრიდან 1500-ზე მეტი დაიღუპა.
მანანა ბანძელაძე
კომენტარები