ხმელთაშუა ზღვის ფსკერზე 7000 წლის წინათ აშენებული გზა აღმოაჩინეს (ვიდეო)

დაახლოებით 4 მეტრის სიგანის სატრანსპორტო მაგისტრალი საგულდაგულოდ დაწყობილი ქვის ფილებისგან არის აგებული. დღეს მას ტალახის სქელი ფენა ფარავს, რაც სულაც არაა გასაკვირი წყალქვეშა სტრუქტურის შემთხვევაში.

მკვლევართა აზრით, ნეოლითური ხანის ჰვარის კულტურამ, რომელიც ერთ დროს ადრიატიკის აღმოსავლეთ ნაწილში ცხოვრობდა, ააშენა ამჟამად წყალში ჩაძირული დასახლება სოლინე და კუნძულებთან მისი დამაკავშირებელი უძველესი დერეფანი.

„ადამიანები ამ გზაზე თითქმის 7000 წლის წინათ დააბიჯებდნენ“, – წერია ზადარის უნივერსიტეტის განცხადებაში.

ეს ნამდვილად არ გახლავთ ერთადერთი საიდუმლო, რომელსაც კუნძული კორჩულა მალავს. მკვლევართა ამავე ჯგუფმა კუნძულის მეორე მხარეს ასევე აღმოაჩინა წყალში ჩაძირული დასახლება, რომელიც ძლიერ ჰგავს სოლინეს და ქვის ხანის საოცარ არტეფაქტებს ინახავს.

დაახლოებით 12 000 წლის წინათ, ნეოლითურ ხანაში, რომელსაც ახალ ქვის ხანასაც უწოდებენ, მსოფლიოს ზოგიერთ ნაწილში ადამიანებმა მონადირე-შემგროვებლობიდან სოფლის მეურნეობასა და ცხოველთა მოშინაურებაზე გადასვლა დაიწყეს; ამას კი უფრო მეტი მუდმივი დასახლებისა და საზოგადოების შექმნა მოჰყვა.

ნეოლითური პერიოდის კუნძულოვანი დასახლებების აღმოჩენა ყოველდღე ნამდვილად არ ხდება. სწორედ ამიტომაც არის ეს აღმოჩენა არქეოლოგთათვის ასე ამაღელვებელი – ის გვიჩვენებს, როგორ ერგებოდნენ ჩვენი წინაპრები სხვადასხვა სახის გარემოს და მათ დამაკავშირებელ გზებსაც კი აგებდნენ.

შემოკლებული ვერსია

სრულად წაიკითხეთ აქ: 1tv.ge/news/khmeltashua-zghvis-fskerze-7000-wlis