ევროპარლამენტის დეპუტატები გავრცელებულ მიმართვაში ევროკომისიის პრეზიდენტს ურსულა ფონ დერ ლაიენს მოუწოდებენ, საქართველო ევროკავშირის უფასო როუმინგის ზონაში ჩართოს.
მიმართვას ევროდეპუტატი ტიის როიტენი (Thijs Reuten) ტვიტერში ავრცელებს. ნიდერლანდელი პოლიტიკოსი წერს:
ქართველი ხალხი იმსახურებს ევროკავშირის მხარდაჭერის ხელშესახებ ნიშანს მის ევროპულ გზაზე. ამიტომ დღეს ევროპარლამენტარებმა ხუთი პოლიტიკური ჯგუფიდან მოუწოდებენ ფონ დერ ლაიენს, ჩართოს საქართველო ევროპის უფასო როუმინგ ზონაში. იმედი გვაქვს, რომ საქართველოს მთავრობა სწრაფად განახორციელებს 12 ძირითად პრიორიტეტს.
The Georgian people deserve a tangible sign of 🇪🇺 support on their European path. Today, MEPs from five political groups therefore call on @vonderLeyen to include 🇬🇪 in the European free roaming area. We count on the 🇬🇪 government to swiftly implement the 12 key priorities. pic.twitter.com/RlzjSOa2qF
— Thijs Reuten 🇪🇺🌹 (@thijsreuten) December 15, 2022
„საქართველოს თითოეული მოქალაქე ევროპული ოჯახის ნაწილია. საქართველოს ჩართვა ევროპულ რეჟიმში მნიშვნელოვანი და კონკრეტული ნაბიჯია საქართველოს ევროპული ამბიციების რეალიზებისკენ.
საქართველომ ევროკავშირის ერთიან როუმინგულ სივრცეში ჩართვა აშკარა პრიორიტეტად რამდენიმე წლის წინ დაასახელა. მას შემდეგ საქართველო აქტიურად მუშაობდა რეგიონული როუმინგის (PRA) და სპექტრის (RSA) ხელშეკრულებების გაფორმებაზე. გარდა ამისა, საქართველოს მაღალგანვითარებული სატელეკომუნიკაციო სექტორი აქვს. ამიტომ იმედი გვაქვს, ევროკომისია მხარს დაუჭერს ერთიანი როუმინგული სივრცის შექმნას საქართველოსა და ევროკავშირს შორის კოორდინირებული დახმარების გზით“, – ნათქვამია ევროპარლამენტარების მიერ გავრცელებულ მიმართვაში.
ევროკავშირის ტერიტორიაზე უფასო როუმინგის ზონა 2017 წელს ამოქმედდა.
უფასო როუმინგის ზონაში ჩართვა ნიშნავს იმას, რომ საქართველოდან ევროკავშირის რომელიმე ქვეყანაში მობილური ტელეფონით დარეკვის შემთხვევაში, თუ როუმინგს იყენებთ, იმავე ტარიფებით ისაუბრებთ ან sms-ს გაგზავნით, როგორიც საქართველოშია.
ნინო ხოშტარია
კომენტარები