„მოდით, გაიცანით კვარაცხელიას დაო… მადლობა თქვენს ქვეყანას, კვარაცხელია რომ გაზარდაო!“ – ნეაპოლში მცხოვრები ქართველი ემიგრანტის ემოციური ისტორია

ფეისბუქ ჯგუფის „ემიგრანტები იტალიაში“ ადმინისტრატორი Mari-Ka ჯგუფში ემოციურ პოსტს აქვეყნებს ამბავზე, რომელიც ხვიჩა კვარაცხელიას გამო ნეაპოლში გადახდა თავს. 

„ნაპოლის” გამარჯვებით გახარებულებს [„ნაპოლიმ“ 23 ოქტომბერს „რომა“ დაამარცხა სტუმრად 1:0 – რედ.], სასიამოვნო პოსტს შემოგთავაზებთ. მოკლედ, რაც ხვიჩა “ნაპოლიში“ გადმოვიდა, მთელ იტალიაში შეიცვალა ქართველების მიმართ დამოკიდებულება, ამაში ყველა დამეთანხმება, ნეაპოლში მცხოვრები ქართველები კი – განსაკუთრებით.

გუშინდელ ამბავს მოგიყვებით: ისეთ უბანში ვიყავი, სადაც შედარებით ნაკლები უცხოელები არიან, ტანსაცმლის მაღაზიაში ვარჩევდი რაღაცებს, კონსულტანტი მომიახლოვდა, დახმარება შემომთავაზა და, იტალიელი ხარო? არა-მეთქი. მიყურებს და, აბა, ჯორჯიანაო? თქვენც ჩვენსავით ლამაზები ხართო!

…ეძახის სხვა კონსულტანტს, მოდიო აქო, ეს კვარაცხელიას და არისო (რახან ქართველი ვიყავი ანუ ) დაუძახა ყველას, მოდით, გაიცანით კვარაცხელიას დაო ბევრნი ხართ ქართველები იტალიაშიო? კი-მეთქი. რა მაგარია, რო ბევრი ხართო ხვიჩას ქვეყნიდანო. თან ემატებიან და ემატებიან მოდის ერთი და გეფიცებით, დაიჩოქა, მადლობა ღმერთს და მადლობა თქვენს ქვეყანას, კვარაცხელია რომ გაზარდაო!

ალბათ ხვდებით ხომ, რა დამემართებოდა! მერე სხვა მოდის და ჩუმად, საიდუმლო ხმით და გამომეტყველებით მეუბნება: ჩემი ცოლი ეჭვიანობს ხვიჩაზეო! არადა მართალია, მართლა შემიყვარდაო ასეა მთელ ნეაპოლში, გარეგნულადაც გვცნობენ და „კვიჩა“, „კვარაშელა“, „კვარა“ ყოველ ნაბიჯზე ისმის, რომ მოგაძახებენ და თან გიღიმიან!

ფოტოზეც ერთ-ერთი კომუნის ჟურნალია! სადგურზე, ბილეთების ჯიხურში დევს, უფასოდ არიგებენ და თუ აღმოაჩინეს, რო ქართველი ხარ, მასე მარტივად ვეღარ დაუსხლტები, სანამ კარგად არ „ავარჯიშებ“ „კვარაცხელიას“ გამოთქმაში, მანამდე არ შეგეშვებიან . სამსახურში ხო, სადაც ვმუშაობ, ყველას „ხვიჩა, ხვიჩა“ აკერია პირზე ერთი მეუბნება, გოლს რომ გაიტანს, სულ მინდა დაგირეკო, მარა მრცხვენიაო მეორეს ხმოვანი აქვს ტელეფონში, როგორ ვკარნახობ „ხვიჩა კვარაცხელია“, ვუსმენ ხოლმე და კარგად გამოთქმა უნდა ვისწავლოო, დაამუღამა, სხვათა შორის გასაყიდად გამოტანილი 77 ნომერი მაისური ჩვეულებრივი ამბავია, აქამდე პირადად მხოლოდ 10 ნომერს ვამჩნევდი ხოლმე. მოკლედ, საოცარი განწყობა სუფევს ირგვლივ და ეს ჩვენი ბიჭის, ხვიჩა კვარაცხელიას დამსახურებაა !! დამეთანხმებით ალბათ, რომ ასეა და გთხოვთ, კომენტარებში თქვენი თავგადასავლებიც გაიხსენოთ“, – წერს Mari-Ka.