საფრანგეთში გარდაიცვალა თანამედროვეობის ერთ-ერთი უდიდესი მთარგმნელი გასტონ ბუაჩიძე

საფრანგეთის ქალაქ ნანტში 86 წლის ასაკში გარდაიცვალა თანამედროვეობის ერთ-ერთი უდიდესი მთარგმნელი, მწერალი და ლიტერატურათმცოდნე, სორბონის უნივერსიტეტის დოქტორი და ნანტ­ის უნივერსიტეტის პროფესორი გასტონ ბუაჩიძე.

მთარგმნელობით და ლიტერატურულ საქმიანობასთან ერთად გასტონ ბუაჩიძე, საფრანგეთში საცხოვრებლად გადასვლამდე (1997 წელს), თითქმის 30 წლის განმავლობაში ეწეოდა აქტიურ პედაგოგიურ მოღვაწეობას თბილისის სახელმწიფო უნივერსიტეტის ფრანგული ლიტერატურის ფაკულტეტზე.

გასტონ ბუაჩიძე 1935 წლის 21 ოქტომბერს დაიბადა თბილისში. მამით ქართველი და დედით ფრანგი, როგორც თავად ამბობდა, სამ ენაზე (ქართული, რუსული და ფრანგული) აზროვნებდა და წერდა. მან ფრანგ მკითხველს თავისი შესანიშნავი თარგმანებით გააცნო დიდი ქართველი მწერლები და პოეტები: შოთა რუსთაველი, ვაჟა-ფშაველა, გალაკტიონ ტაბიძე, ილია ჭავჭავაძე, აკაკი წერეთელი და სხვები; გარდა ამისა, ფრანგულიდან ქართულად თარგმნა ცნობილი ფრანგი მწერლების არაერთი ნაწარმოები. ბუაჩიძის თქმით, მისი მთავარი მთარგმნელობითი ნამუშევარი „ვეფხისტყაოსანია“, რომლის ფრანგულად თარგმნასაც 14 წელი მოანდომა.

გასტონ ბუაჩიძე იყო თბილისისა და ნანტის დაძმობილების ინიციატორი, 1999 წელს მისი ორგანიზებით მოეწყო ნანტის ხელოვნების მუზეუმში ფიროსმანის ნამუშევრების გამოფენა.

ნინო ხოშტარია