fbpx
მსოფლიოსაზოგადოება

ოქროს ციებ-ცხელება და ამაზონის აუზის „ოქროს მდინარეები“, რომლებიც კოსმოსიდან ჩანს

NASA-ს მიერ გამოქვეყნებულ იშვიათ ფოტოებზე კარგად ჩანს პერუში, ამაზონის ჯუნგლებში მიმდინარე ოქროს მოპოვების მასშტაბი. სამუშაოების დიდი ნაწილი, სავარაუდოდ, არალეგალურია.

კოსმოსური სააგენტოს განცხადებით, ფოტოებზე ასახული „ოქროს მდინარეები“ სინამდვილეში მომპოვებელთა მიერ უნებართვოდ გაჭრილი თხრილებია. როგორც წესი, ისინი უხილავია, მაგრამ კადრში მზის სინათლის არეკვლის გამო მოექცა.

უჩვეულო ფოტოები დეკემბერში საერთაშორისო კოსმოსური სადგურზე მყოფმა ასტრონავტმა გადაიღო.

სურათები კიდევ ერთხელ ამტკიცებს ოქროს მომპოვებელთა გამანადგურებელი საქმიანობის მასშტაბს სამხრეთ-აღმოსავლეთ პერუში, მადრე-დე-დიოსის რეგიონში.

პერუ ოქროს ერთ-ერთი წამყვანი ექსპორტიორია მსოფლიოში; მადრე-დე-დიოსის რეგიონში ეს ინდუსტრია დიდწილად დაურეგულირებელია და მასზე დამოკიდებულია ათასობით მომპოვებლის ცხოვრება.

ეს ზონა ბიომრავალფეროვნების ცხელი წერტილია, მაგრამ მოპოვების ინდუსტრია ხე-ტყის ჩეხას და სასიცოცხლო ჰაბიტატთა განადგურებას იწვევს.

მოპოვებითი საქმიანობა წამლავს ადგილობრივ საზოგადოებებსაც, რადგან ძვირფასი ლითონის მოსაპოვებლად ტონობით მერკურის იყენებენ, რომლის დიდი ნაწილიც, მეცნიერთა განცხადებით, მდინარეებში იღვრება ან ატმოსფეროში ადის.

NASA-ს განმარტებით, თხრილები, სადაც მომპოვებლები ოქროს ეძებენ, წყლით სავსე ასობით აუზი უნდა იყოს; მათ გარს აკრავს მიწაყრილები, რომლებიც მანამდე მცენარეულობით უნდა ყოფილიყო დაფარული.

მომპოვებლები მიჰყვებიან გზებს, სადაც ერთ დროს მდინარეები მიედინებოდა და სხვადასხვა მინერალია დალექილი.

მეცნიერთა განცხადებით, მოპოვებითი საქმიანობა ამ რეგიონში ხე-ტყის ჩეხის ძირითადი მიზეზია; ამავე დროს, ამ რეგიონში ბინადრობს ისეთი სახეობები, როგორებიც არინ: იაგუარები, მაიმუნები, პეპლები.

2019 წლის იანვარში ჩატარებული კვლევის მიხედვით, 2018 წელს ოქროს მოპოვების გამო პერუს ამაზონში 9 279 ჰექტარი ტყის საფარი განადგურდა.

ადგილობრივი საზოგადოებების ღატაკი მოსახლეობის დიდი ნაწილის არსებობა დიდწილად ოქროს მოპოვებაზეა დამოკიდებული. 2012 წელს რეგიონში ამ საქმიანობაში ჩართული იყო 30 000-მდე მცირე მასშტაბის მომპოვებელი.

პერუს ამაზონის კიდევ ერთ ზონაში, ლა-პამპაში ოქროს ციებ-ცხელებამ ათწლეულზე მეტხანს გასტანა, ვიდრე მთავრობა მას 2019 წელს საბოლოოდ დახურავდა. მაშინ ზონიდან დაახლოებით 5000 მომპოვებელი განდევნეს.

მომზადებულია BBC-ის მიხედვით.

ავტორი – მიხეილ ჭაბუკაშვილი
1tv.ge
კომენტარები
თეგები

მსგავსი სიახლეები

Leave a Reply

Your email address will not be published. Required fields are marked *

Back to top button
გაზიარება
Close